बैतडीदेखि धनगढीसम्म अचार व्यवसायको सञ्जाल, उद्यमी कार्कीलाई प्रदेश सरकारको सम्मान

धनगढी । बैतडीको दोगडाकेदार गाउँपालिका वडा नम्बर -७ का टेक बहादुर कार्की सुदूरपश्चिम प्रदेश सरकारको “उत्कृष्ट उद्यमी सम्मान” बाट सम्मानित हुनुभएको छ। दोगडाकेदारमा ‘सुदर्शन कृषि तथा लघु उद्यम फर्म’ सञ्चालन गरी स्वदेशमै श्रम तथा स्वरोजगारको माध्यमबाट उद्यमशीलताको प्रवर्द्धन गर्न खेलेको भूमिकाको उच्च मूल्याङ्कन गर्दै सामाजिक विकास मन्त्रालयले उहाँलाई सम्मानित गरेको हो।

सुदूरपश्चिम प्रदेश सरकार, सामाजिक विकास मन्त्रालयद्वारा आयोजित उत्कृष्ट श्रमिक उद्यमी सम्मान पुरस्कार कार्यक्रममा सामाजिक विकास मन्त्री बेल बहादुर राना मगर र राज्यमन्त्री मधु भारतीले उद्यमी कार्कीलाई नगद रु. ५०,००० (अक्षेरुपी पचास हजार) सहित उक्त सम्मान-पत्र प्रदान गर्नुभएको हो।

विगत १० वर्षदेखि उद्यम क्षेत्रमा क्रियाशील कार्कीले सुरुका दिनमा पहाडका किसानहरूले उब्जाएको अचार, मसला र पहाडी दालहरू तराईमा ल्याएर बेच्ने कार्य गर्नुभएको थियो। विगत ८ वर्षदेखि भने उहाँले अचार व्यवसायलाई मुख्य प्राथमिकतामा राख्दै बैतडीको दोगडाकेदार वडा नम्बर -७ रिखालीमा ‘सुदर्शन कृषि तथा लघु उद्यम फर्म’ सञ्चालन गरिरहनुभएको छ। व्यवसाय विस्तार गर्ने क्रममा उहाँले कैलालीको धनगढी उपमहानगरपालिका वडा नम्बर -३ बोराडाँडीमा ‘गीता कृषि तथा लघु उद्यम फर्म’ नामको शाखासमेत सञ्चालनमा ल्याउनुभएको छ।

उहाँका फर्महरूबाट आँप, अमला, लप्सी, कागती, तथा चिकन र मटनको स्वादिलो अचार लगायतका विभिन्न परिकारहरू उत्पादन हुँदै आएका छन्। यस व्यवसायको माध्यमबाट कार्की आफैँले मनग्य आम्दानी गरिरहनुभएको मात्र छैन, ७ जना स्थानीयलाई प्रत्यक्ष रोजगारीसमेत प्रदान गर्नुभएको छ।

व्यावसायिक उत्पादनसँगै सामाजिक उत्तरदायित्व वहन गर्दै कार्कीले विभिन्न ठाउँमा अचार बनाउने तालिमसमेत प्रदान गर्दै आउनुभएको छ। उहाँले हालसम्म २५० भन्दा बढी व्यक्तिहरूलाई तालिम दिएर स्वरोजगार बन्न प्रेरित गरिसक्नुभएको छ।