असार १५ गतेसम्म आइपुग्दा पनि मधेश प्रदेशमा धान रोपाइँको प्रगति ४ दशमलव ३६ प्रतिशतमा सीमित भएको छ।
भूमि व्यवस्था, कृषि तथा सहकारी मन्त्रालयका अनुसार प्रदेशमा धान रोपाइँ हुने कुल ३ लाख ८७ हजार ९३३ हेक्टर क्षेत्रफलमध्ये हालसम्म १६ हजार ९११ हेक्टरमा मात्रै रोपाइँ सम्पन्न भएको छ।
जिल्लागत रूपमा महोत्तरीमा सबैभन्दा बढी ८ दशमलव १७ प्रतिशत रोपाइँ भएको छ। धनुषा र बारामा ७–७ प्रतिशत, सिरहा र सप्तरीमा ५–५ प्रतिशत तथा सर्लाहीमा २ दशमलव ५ प्रतिशत रोपाइँ भएको मन्त्रालयले जनाएको छ। पर्सा र रौतहटमा भने चैते धान अझै नकाटिएकाले रोपाइँ सुरु हुन सकेको छैन।
हाल प्रदेशभर वर्षा भइरहेकाले अब धान रोपाइँले गति लिने अपेक्षा किसानहरूले गरेका छन्।
यसैबीच, आज देशभर २३औँ राष्ट्रिय धान दिवस तथा रोपाइँ महोत्सव विविध कार्यक्रमका साथ मनाइएको छ। ‘जलवायुमैत्री प्रविधि, धानमा आत्मनिर्भरता र समृद्धि’ भन्ने मूल नाराका साथ कृषि तथा पशुपक्षी विकास मन्त्रालयसहित विभिन्न सरकारी तथा गैरसरकारी निकायहरूले सामूहिक रोपाइँ तथा जनचेतनामूलक कार्यक्रम आयोजना गरेका छन्।
नेपाली समाजमा असार १५ लाई दही–चिउरा खाने पर्वका रूपमा पनि मनाइन्छ। किसानहरू आज हिलो खेल्दै, असारे गीत गाउँदै र धान रोप्दै परम्परागत रूपमा राष्ट्रिय धान दिवस मनाइरहेका छन्।
Discussion about this post