राष्ट्रपति रामचन्द्र पौडेलले जमिन बाँझो राख्ने प्रवृत्तिको अन्त्य गर्दै कृषिलाई आधुनिकीकरण, व्यावसायिक र आकर्षक पेसाका रूपमा विकास गर्नुपर्नेमा जोड दिनुभएको छ।
२३ औँ राष्ट्रिय धान दिवस, २०८३ का अवसरमा शुभकामना सन्देश जारी गर्दै राष्ट्रपति पौडेलले कृषिलाई आधुनिक बनाउन सके विदेश पलायन हुन बाध्य जनशक्तिलाई स्वदेशमै रोक्न सकिने तथा धान–चामलको आयात घटाउन सकिने बताउनुभयो।
उहाँले श्रम संस्कृतिको विकास गर्दै धान उत्पादनमा आत्मनिर्भर बन्न सबै पक्षले ध्यान दिनुपर्ने उल्लेख गर्नुभयो। साथै कृषि क्षेत्रलाई केवल जीविकोपार्जनको माध्यम नभई व्यावसायिक पेसाका रूपमा अघि बढाउन सरकार र सम्बन्धित निकायको विशेष भूमिका आवश्यक रहेको उहाँको भनाइ छ।
राष्ट्रपति पौडेलले जलवायु परिवर्तनका कारण धानखेतीमा देखिएको नकारात्मक प्रभावप्रति चिन्ता व्यक्त गर्दै जलवायुमैत्री प्रविधिको प्रयोग र सिँचाइ सुविधाको विस्तारमा राज्यले प्राथमिकता दिनुपर्ने बताउनुभयो।
धान नेपालको प्रमुख खाद्यान्न बाली भएकाले यसको आर्थिक, सामाजिक, सांस्कृतिक र धार्मिक महत्व रहेको उल्लेख गर्दै उहाँले संविधानले खाद्य अधिकारलाई मौलिक हकका रूपमा सुनिश्चित गरेको स्मरण गराउनुभयो।
यस वर्षको धान दिवस ‘जलवायुमैत्री प्रविधि, धानमा आत्मनिर्भरता र समृद्धि’ भन्ने नारासहित देशभर विभिन्न कार्यक्रम गरी मनाइएको छ।
Discussion about this post