कञ्चनपुर । कञ्चनपुरको भीमदत्त नगरपालिका वडा नम्बर -११ का व्यावसायिक कृषक वीर बहादुर खड्काले लगाएको तरकारी बालीमा असिना र डुबानले ठुलो क्षति पुर्याएको छ।
झण्डै ५ विगाहा क्षेत्रफलमा लगाइएको काँक्रा, फर्सी, लौका र बन्दा लगायतका बालीहरू नष्ट भएपछि कृषक खड्का यतिबेला निकै चिन्तित बन्नुभएको छ।विगत ७ वर्षदेखि तरकारी खेतीलाई नै मुख्य आम्दानीको स्रोत बनाउँदै आउनुभएका खड्काले निकै मेहनतका साथ ५ विगाहा क्षेत्रफलमा व्यावसायिक खेती विस्तार गर्नुभएको थियो।
चैत २५ गते परेको असिना र डुबानका कारण उहाँको साढे २ विगाहामा लगाइएको काँक्रा र फर्सी लगभग पूर्ण रूपमा नष्ट भएको छ। खड्काका अनुसार असिनाले बन्दा पूर्ण रूपमा खराब गरेको छ भने धनिया र खुर्सानी खेतीमा समेत ठुलो नोक्सानी पुगेको छ।
ठुलो क्षेत्रफलमा व्यावसायिक खेती गर्ने कृषकहरूलाई प्राकृतिक प्रकोपका समयमा स्थानीय सरकार र सरोकारवाला निकायले उचित क्षतिपूर्ति र राहतका लागि पहल गरिदिनुपर्ने माग समेत उहाँले गर्नुभएको छ।
Discussion about this post