कञ्चनपुर । कञ्चनपुरको वेदकोट नगरपालिकामा नगरस्तरीय उत्थानशील युवा सञ्जाल गठन तथा अभिमुखीकरण कार्यक्रम सम्पन्न गरिएको छ। वेदकोट नगरपालिका, नेपाल राष्ट्रिय समाज कल्याण सङ्घ (एनएनएसडब्लुए), आईएचआरआर र डिसिए नेपालको सहकार्यमा उक्त कार्यक्रमको आयोजना गरिएको हो।
कार्यक्रममा ११ सदस्यीय कार्यसमिति सहितको ‘नगरस्तरीय उत्थानशील युवा सञ्जाल’ गठन गरिएको छ।
एनएनएसडब्लुएका पूर्व सूचना तथा पूर्व कार्य अधिकृत भोजराज भट्टले नवगठित सञ्जालले विशेष गरी सामाजिक सेवामूलक क्रियाकलापहरू, विपद् जोखिम न्यूनीकरण तथा व्यवस्थापन, पर्यावरण संरक्षण र जनचेतनामूलक अभियानहरूमा सक्रिय भूमिका निर्वाह गर्ने बताउनुभयो। उहाँले स्थानीय स्तरमा आइपर्ने साना-ठूला विपद्का समयमा युवाहरूको संगठित शक्तिले खोज, उद्धार र राहत वितरणमा प्रभावकारी काम गर्न सक्ने उल्लेख गर्दै समुदायको उत्थानशीलता बढाउन सञ्जालले काम गर्ने विश्वास व्यक्त गर्नुभयो।
कार्यक्रममा बोल्दै वेदकोट नगरपालिकाका नगर प्रमुख भोजराज बोहराले युवा शक्ति राष्ट्रको मेरुदण्ड भएको उल्लेख गर्दै नगरको विकास र विपद् व्यवस्थापनमा युवाहरूको सहभागिता हुनुपर्नेमा जोड दिनुभयो। नगर प्रमुख बोहराले युवा सञ्जाललाई नगरपालिकाको तर्फबाट आवश्यक सहयोग र समन्वय रहने प्रतिबद्धता समेत व्यक्त गर्नुभयो।
कार्यक्रममा नगर उपप्रमुख तुलसी जोशी, प्रमुख प्रशासकीय अधिकृत हरिदत्त भट्ट लगायतको उपस्थिति रहेको थियो। कार्यक्रमको सञ्चालन वेदकोट नगरपालिकाका सूचना प्रविधि अधिकृत तथा विपद् सम्पर्क व्यक्ति सुनिल चन्दले गर्नुभएको थियो।
Discussion about this post