कञ्चनपुर – कञ्चनपुरको महेन्द्रनगरमा आचार्य टङ्कप्रसाद अवस्थीद्वारा सम्पादित धार्मिक कृति ‘श्रीमद्भागवतकथामृतसार’ को विमोचन गरिएको छ।
टङ्कप्रसाद अवस्थी तथा परिवारको आयोजना र जनज्योति बहुमुखी क्याम्पसको सह-आयोजनामा सम्पन्न उक्त कार्यक्रमको अध्यक्षता जनज्योति एजुकेसनल फाउन्डेसनका अध्यक्ष माधब जोशीले गर्नुभएको थियो।
कृतिको समीक्षा सह-प्राध्यापक हरिप्रसाद खतिवडा र उप-प्राध्यापक शिवराज गर्नुभएको थियो। उहाँहरूले धार्मिक र आध्यात्मिक जिज्ञासुहरूका लागि यो पुस्तक उपयोगी सङ्ग्रह हुने विश्वास व्यक्त गर्नुभयो।
जनज्योति बहुमुखी क्याम्पसका क्याम्पस प्रमुख प्रकाश दत्त जोशीले पुस्तक लेखन कार्य आफैँमा जटिल र चुनौतीपूर्ण रहेको बताउनुभयो। लेखक अवस्थीलाई बधाई दिँदै उहाँले यस्तो महत्वपूर्ण प्राज्ञिक र आध्यात्मिक कार्यको निरन्तरताका लागि शुभकामना समेत दिनुभयो।
कार्यक्रममा स्थानीय बुद्धिजीवी, शिक्षाविद् र समाजसेवीहरूको उल्लेख्य उपस्थिति रहेको थियो।
Discussion about this post