काठमाडौँ । हामीमध्ये धेरै जनामा बिहान उठ्ने बित्तिकै चिया पिउने बानी छ । कोही चियासँगै बिस्कुट खान्छन् । तर कसैलाई चाँहि चियासँग चुरोट नभइ हुँदैन ।
चियासँग चुरोट पिउने बानी सही र स्वस्थ हो त ? के तपाई पनि चिया पिउने क्रममा धूम्रपान गर्नुहुन्छ ? यो बानीले तपार्इंलाई हानी पुर्याउन सक्छ । चुरोट पिउनु राम्रो होइन । अझ चुरोट र चिया एक साथ सेवन गर्नु त झनै राम्रो बानी होइन । यो अत्यन्त हानिकारक हुन सक्छ । जाडो मौसममा घरको बार्दली, सडकको छेउमा उभिएर चिया पिउँदै चुरोट पिउनुहुन्छ भने सावधान ।
यस्ता छन् चियासँग चुरोट पिउँदाका हानीहरू
–यो बानीले स्वास्थ्यसम्बन्धी कयौँ समस्या गराउन सक्छ । चियाको घुट्कोसँगै चुरोट तान्दा तनाव, चिन्ता र थकानबाट मुक्ति मिल्छ भन्ने सोच्नुहुन्छ भने तपाईँ बिलकुल गलत हुनुहुन्छ । चिया पिउनु हानिकारक छैन, तर यसको साथमा चुरोट पिउनाले धेरै शारीरिक समस्याहरू निम्त्याउन सक्छ । यो मध्ये एउटा समस्या चाँहि कब्जियत हो ।
– चियामा पाइने क्याफिनले पाचन प्रणालीमा मिश्रित प्रभाव पार्न सक्छ । धेरै चिया पिउनुहुन्छ, यसले शरीरमा पानीको कमी हुन सक्छ । जसका कारण दिसा निकै टाइट हुन्छ र शौच गर्न समस्या हुन सक्छ । पेट राम्रोसँग सफा हुँदैन । क्याफिनले पिसाब नलीमा जलन गराउँछ ।
– पानीको अभावका कारण दिसाको स्थिरता र मार्ग प्रभावित हुन्छ । यसले कब्जियतको समस्या बढाउन सक्छ । ल्याक्टोज सहन नसक्ने व्यक्तिलाई पेट फुल्ने, कब्जियत जस्ता पाचन समस्याहरू हुन सक्छ ।
– ग्यास्ट्रोइंटेस्टाइनल (जीआई) मार्गमा पनि गम्भीर प्रभाव पर्न सक्छ । चुरोटमा पाइने निकोटिनको मात्राले स्नायु प्रणालीलाई उत्तेजित गर्छ । आन्द्राको गतिविधिलाई तीव्र बनाउन सक्छ । लगातारको धूम्रपानले आन्द्राको माइक्रोबायोटाको सन्तुलन गडबड हुन सक्छ ।
– यसको अतिरिक्त, निकोटिनले आन्द्रामा रक्त प्रवाह कम गर्छ । यसले आन्द्राको काम गर्ने क्षमता घट्छ । यी समस्याबाट बच्न चियाको सेवन घटाउनुपर्छ ।
– हरेक दिन ८ देखि १० गिलास पानी पिउनुहोस् । यसो गर्दा क्याफिनको प्रभावलाई कम गर्न सकिन्छ ।
– यदि तपाई धेरै चुरोट पिउनुहुन्छ भने आजैदेखि यो बानी घटाउँदै लैजानुहोस् । बिस्तारै धूम्रपान छाड्दै गएर यसलाई पूरै ठप्प पारिदिनुहोस् । रातोपाटी बाट साभार
