काठमाडौं । नेपाल प्रिमियर लिग (एनपीएल) खेल्न नेपाल आएका कर्णाली याक्सका पाकिस्तानी खेलाडी साहिबजादा फरहान राष्ट्रिय टोलीमा छनोट भएपछि पाकिस्तान फर्किने भएका छन्।
श्रीलंकाविरुद्ध हुने एकदिवसीय अन्तर्राष्ट्रिय (ओडीआई) शृङ्खलाका लागि पाकिस्तानको राष्ट्रिय टोलीमा समावेश भएपछि उनलाई पाकिस्तान क्रिकेट बोर्डले फिर्ता बोलाएको हो।
पाकिस्तान र श्रीलंकाबीचको एकदिवसीय शृङ्खला अक्टोबर ३१ मा सकिने तालिका छ। त्यसपछि फरहान पुनः एनपीएल खेल्न नेपाल फर्किन सक्ने सम्भावना रहे पनि उनको पुनरागमन निश्चित भइसकेको छैन।
कर्णाली याक्सका अनुसार पाकिस्तान क्रिकेट बोर्डले ‘नो अब्जेक्सन सर्टिफिकेट’ (एनओसी) का विषयमा पुनः रकम माग गरेको छ। फरहान एनओसी लिएरै नेपाल आएका थिए। तर, उनी नेपाल आइसकेपछि बोर्डले थप रकम माग गरेको कर्णाली स्रोतले जनाएको छ।
यसैबीच, कर्णाली याक्सले पाकिस्तानका अर्का खेलाडी हुसेन तलातलाई पनि टोलीमा अनुबन्ध गरेको छ। यद्यपि, उनले यस सिजनको एनपीएल खेल्ने वा नखेल्ने भन्ने विषयमा पनि टुंगो लागिसकेको छैन।
Discussion about this post