काठमाडौं । कृषि, वन तथा पर्यावरणमन्त्री गीता चौधरीले दसैँअघि नै उखु किसानलाई अनुदान रकम भुक्तानी गर्न सम्बन्धित निकायलाई निर्देशन दिएकी छन्।
शुक्रबार मन्त्रालयअन्तर्गत आयोजित एसएमटी बैठकमा मन्त्री चौधरीले उखु उत्पादन अनुदान वितरणसम्बन्धी कार्यविधि स्वीकृत भइसकेकाले किसानले दसैँअघि नै रकम पाउने गरी आवश्यक व्यवस्था मिलाउन निर्देशन दिएकी हुन्।
उखु उत्पादक किसानलाई प्रोत्साहनस्वरूप उपलब्ध गराइने अनुदान वितरणका लागि ‘उखु उत्पादन अनुदानसम्बन्धी भुक्तानी कार्यविधि, २०८३’ स्वीकृत भइसकेको मन्त्रालयले जनाएको छ। आर्थिक वर्ष २०८३/८४ का लागि अनुदानबापत १ अर्ब ५० करोड ५० हजार रुपैयाँ निकासा भएको उल्लेख गरिएको छ।
किसानले समयमै अनुदान प्राप्त गर्नुपर्नेमा जोड दिँदै मन्त्री चौधरीले भुक्तानी प्रक्रियामा कुनै पनि प्रकारको ढिलाइ नगर्न सम्बन्धित निकायलाई निर्देशन दिएकी छन्। उनले दसैँअघि नै किसानको हातमा अनुदान रकम पुग्ने गरी प्रक्रिया अघि बढाउनसमेत आग्रह गरेकी छन्।
Discussion about this post