काठमाडौं । रसुवालगायत विभिन्न जिल्लामा आएको विनाशकारी बाढी तथा पहिरोबाट भएको ठूलो जनधनको क्षतिप्रति तेक्वान्दो खेलको अन्तर्राष्ट्रिय सर्वोच्च संस्था विश्व तेक्वान्दोले दुःख व्यक्त गरेको छ।
विश्व तेक्वान्दोका अध्यक्ष डा. चोङ वन चोले मंगलबार नेपाल तेक्वान्दो संघका अध्यक्ष दीपराज गुरुङलाई पठाएको पत्रमार्फत विपद्मा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारप्रति गहिरो समवेदना व्यक्त गरेका छन्।
विश्व तेक्वान्दोले बाढीपहिरोबाट प्रभावित समुदायको शीघ्र पुनःस्थापनाका लागि आवश्यक पहल गर्नुपर्नेमा जोड दिँदै जारी खोज, उद्धार तथा राहतका कार्यलाई अझ प्रभावकारी बनाउन नेपाल सरकारसँग आग्रह गरेको छ।
अध्यक्ष चोले यसअघि पनि नेपालमा आएको प्राकृतिक विपद्का समयमा सहयोग र ऐक्यबद्धता जनाउँदै आएका छन्। २०७२ सालको विनाशकारी भूकम्पपछि उनले सिन्धुपाल्चोकका भूकम्प प्रभावित क्षेत्रको भ्रमण गर्नुका साथै आर्थिक सहयोगसमेत गरेका थिए।
नेपालमा विभिन्न समयमा आइपर्ने प्राकृतिक विपद्का क्रममा विश्व तेक्वान्दो र अध्यक्ष चोले देखाउँदै आएको सदासयता, ऐक्यबद्धता तथा सहयोगप्रति नेपाल तेक्वान्दो संघले कृतज्ञता व्यक्त गरेको छ।
यसअघि भोटेकोशी नदीमा आएको विनाशकारी बाढीबाट भएको मानवीय तथा भौतिक क्षतिप्रति विश्व तेक्वान्दोको मुख्यालय कुकिवनले पनि दुःख व्यक्त गर्दै नेपालको पीडाप्रति ऐक्यबद्धता जनाएको थियो।
कुकिवनका अध्यक्ष युन उङ सुकले गत अगस्ट २८ मा नेपाल तेक्वान्दो संघका अध्यक्ष दीपराज गुरुङलाई पठाएको समवेदना पत्रमा रसुवा, नुवाकोट र धादिङमा आएको भीषण बाढीबाट भएको जनधनको क्षतिप्रति दुःख व्यक्त गरेका थिए।
विश्व तेक्वान्दोको पछिल्लो समवेदनाले विपद्को समयमा नेपालप्रति अन्तर्राष्ट्रिय खेल समुदायबाट देखाइएको ऐक्यबद्धता र सहयोगलाई थप बलियो बनाएको नेपाल तेक्वान्दो संघले जनाएको छ।
Discussion about this post