काठमाडौं । प्रधानमन्त्री बालेन शाहले रसुवाको भोटेकोशीमा आएको विनाशकारी बाढीले जलवायु परिवर्तनसँगै हिमालय क्षेत्रमा विपद्को जोखिम बढ्दै गएको गम्भीर संकेत गरेको बताएका छन्।
प्रतिनिधिसभाको आजको बैठकमा बोल्दै प्रधानमन्त्री शाहले विपद्को क्षति व्यवस्थापनसँगै यस्ता घटना किन र कसरी भइरहेका छन् भन्ने विषयमा गम्भीर अध्ययन र बहस आवश्यक रहेको बताए।
उनले भोटेकोशी नदीमा आएको बाढी हिमालय क्षेत्रमा हिउँ–चट्टानको हिमपहिरोबाट सिर्जित ठूलो विपत्तिका रूपमा देखिएको उल्लेख गरे। उनका अनुसार यस घटनाले जलवायु परिवर्तनका कारण हिमालय क्षेत्रमा आगामी दिनमा थप जोखिम निम्तिन सक्ने संकेत गरेको छ।
प्रधानमन्त्री शाहले भने, ‘अचानक व्यहोरेको यो ठूलो विपद्को क्षति व्यवस्थापनमा अहोरात्र जुट्दै गर्दा हाम्रो मनमा अर्को एउटा गहिरो प्रश्न पनि जन्मिएको छ। त्यो हो– हामीमाझ कसरी यो विपद् आइलाग्यो?’
जलवायु परिवर्तनका कारण नेपालले भोगिरहेको विपद्को विषयलाई अन्तर्राष्ट्रिय समुदायसमक्ष प्रभावकारी रूपमा उठाउनुपर्नेमा पनि उनले जोड दिए।
‘हामी त सचेत हुनैपर्छ, सँगसँगै हामीले जलवायु परिवर्तनका कारण भोग्नुपरेको विपद्बारे अन्तर्राष्ट्रिय समुदायसमक्ष बलियो गरी प्रस्तुत गर्नुपर्ने बेला आएको छ,’ प्रधानमन्त्री शाहले भने।
जलवायु परिवर्तन विश्वव्यापी समस्या भएकाले त्यसबाट हुने असर न्यूनीकरण तथा विपद् व्यवस्थापनमा अन्तर्राष्ट्रिय समुदायको साझा जिम्मेवारी रहेको प्रधानमन्त्री शाहको भनाइ छ।
उनले हिमालय क्षेत्रको संवेदनशीलता र नेपालले जलवायु परिवर्तनका कारण भोगिरहेको जोखिमलाई विश्व समुदायले गम्भीरतापूर्वक लिनुपर्ने आवश्यकता औँल्याए।
Discussion about this post