कञ्चनपुर । कञ्चनपुर सहकारी सम्मेलन-२०८३ सुरु भएको छ। सम्मेलनको पहिलो दिन सहकारीको वर्तमान अवस्था, विद्यमान समस्या र समाधानका उपायहरू, युवा, महिला र उद्यमशीलतामा सहकारीको भूमिका तथा स्थानीय अर्थतन्त्रको विकासमा सहकारीको योगदान लगायतका महत्त्वपूर्ण विषयहरूमा केन्द्रित रहेर सघन प्यानल छलफल गरिएको छ।
सम्मेलनमा कञ्चनपुरका स्थानीय उत्पादनहरूको समेत विशेष प्रदर्शनी गरिएको छ। स्थानीय स्तरमै उत्पादित जुत्ता, चप्पल, दुना टपरी, मह, इन्टरलक ब्लक तथा गड्यौला मल लगायतका विभिन्न रैथाने सामग्रीहरू प्रदर्शनीमा राखिएका हुन्।
स्थानीय उत्पादनलाई प्रवर्द्धन गर्ने र उत्पादकहरूलाई बजारसँग जोड्ने उद्देश्यका साथ यो प्रदर्शनीको आयोजना गरिएको हो। नेपाल राष्ट्रिय समाज कल्याण संघ (एनएनएसडब्लुए) र डिसिए नेपालद्वारा सञ्चालित ‘सुदृढ’ परियोजना अन्तर्गत स्थानीय उत्पादनमा लागेका उद्यमीहरूलाई आर्थिक, प्राविधिक तथा क्षमता विकास सम्बन्धी सहयोग प्रदान गरिएको थियो।
परियोजनाबाट विभिन्न समयमा सहयोग प्राप्त गरी आत्मनिर्भरतातर्फ उन्मुख भएका स्थानीय उद्यमीहरूलाई थप प्रोत्साहन गर्न र उनीहरूको बजार पहुँच विस्तार गर्न यो प्रदर्शनी कार्यले महत्त्वपूर्ण भूमिका खेलेको छ।
सुदृढ परियोजनाका संयोजक राजकुमार सुनारले स्थानीय स्रोत र साधनको अधिकतम उपयोग गरी स्वरोजगार बनेका उद्यमीहरूको उत्पादनलाई बृहत् मञ्च दिन यो सहकार्य गरिएको बताउनुभयो। उहाँले परियोजनाको मुख्य लक्ष्य नै समुदायलाई आर्थिक रूपमा बलियो र विपद् उत्थानशील बनाउनु रहेकाले आगामी दिनमा पनि यस्ता घरेलु तथा लघु उद्यमहरूलाई दिगो बनाउन आर्थिक र प्राविधिक सहयोग निरन्तर जारी रहने बताउनुभयो।
सम्मेलनमा सहभागी सहकारीकर्मी, सरोकारवाला निकायका प्रतिनिधि तथा आम उपभोक्ताहरूले स्थानीय स्तरमा भएका यस्ता नवप्रवर्तनकारी उत्पादनहरूको अभिरुचिका साथ अवलोकन गर्नुका साथै उद्यमशीलताको खुलेर प्रशंसा गरेका छन्।
Discussion about this post