कृषि, वन तथा वातावरण मन्त्रालयले चैते धान उत्पादक किसानले उचित मूल्य पाउने सुनिश्चित गर्न सरकारले निर्धारण गरेको न्यूनतम समर्थन मूल्य प्रभावकारी रूपमा लागू गर्न सम्बन्धित निकायलाई आग्रह गरेको छ ।
मन्त्रालयले उद्योगी, व्यापारी, कृषि क्षेत्रका सरोकारवाला संस्था तथा स्थानीय तहसँग समन्वय गरी किसानबाट तोकिएको मूल्यमा धान खरिदको व्यवस्था मिलाउन जोड दिएको हो । मन्त्रालयका अनुसार उत्पादन लागतको आधारमा निर्धारण गरिएको समर्थन मूल्यले किसानलाई राहत पुग्नुका साथै धान खेतीप्रति आकर्षण बढाउने अपेक्षा गरिएको छ ।
सरकारले चालु आर्थिक वर्षका लागि १८ प्रतिशतसम्म चिस्यान भएको चैते धानको न्यूनतम समर्थन मूल्य प्रतिक्विन्टल २ हजार ८ सय ६६ रुपैयाँ ४१ पैसा तोकेको छ । तर बजारमा सस्तो आयातित धान तथा मूल्य अस्थिरताका कारण किसानले अपेक्षित लाभ लिन नसकेको गुनासो बढ्दै गएको छ ।
मन्त्रालयले खाद्य सुरक्षालाई सुदृढ बनाउन र धान उत्पादनमा आत्मनिर्भरता हासिल गर्न चैते धान खेतीको संरक्षण तथा विस्तार आवश्यक रहेको जनाएको छ । यसका लागि किसान, चामल उद्योगी र सम्बन्धित निकायबीच सहकार्य बढाउँदै निर्धारित समर्थन मूल्य कार्यान्वयनमा विशेष ध्यान दिइने मन्त्रालयको भनाइ छ ।
Discussion about this post