काठमाडौं । नेपाल आयल निगम ले हप्तामा दुई दिन बिदा लागू हुँदा झण्डै १० प्रतिशत इन्धन खपत घट्ने अनुमान गरेको छ । निगमका अनुसार देशभर दैनिक करिब २५ लाख लिटर पेट्रोल र ५० लाख लिटर डिजेल खपत हुँदै आएको छ । हप्तामा एक दिन अतिरिक्त बिदा थपिँदा कुल उपभोगको करिब १० प्रतिशत अर्थात् ७ लाख ५० हजार लिटर इन्धन बचत हुन सक्ने अनुमान गरिएको हो ।
निगमका प्रवक्ता मनोज ठाकुर ले भने उक्त निर्णयले इन्धन सङ्कट कम गर्न कति योगदान पुर्याउँछ भन्ने यकिन गर्न कम्तीमा एक हप्ता कुर्नुपर्ने बताउनुभयो । “बजारको माग बुझ्न केही समय लाग्छ, तर यसको प्रभाव पक्कै देखिन्छ,” उहाँले भन्नुभयो । उहाँले बिदाको अवसरमा अनावश्यक रूपमा सवारी प्रयोग नगर्न आग्रह गर्दै उपभोक्ताको सहयोग आवश्यक रहेको उल्लेख गर्नुभयो । “बिदा पाइयो भनेर घुम्न नजानुहोस्, इन्धन बचतमा सबैले ध्यान दिनुपर्छ,” उहाँको भनाइ छ ।
हिजोको मन्त्रिपरिषद् बैठकले शनिबार र आइतबार सरकारी कार्यालय तथा शैक्षिक संस्थामा बिदा दिने निर्णय गरेको हो । यसअघि पनि २०७९ सालमा यस्तो निर्णय गरिए पनि अव्यावहारिक भएको भन्दै एक महिनामै खारेज गरिएको थियो ।
त्यस्तै, २०५६ सालदेखि सुरु गरिएको दुई दिने सार्वजनिक बिदाको अभ्यास पनि करिब दुई वर्ष मात्र लागू भएको थियो ।
Discussion about this post