कञ्चनपुर – कञ्चनपुरको भीमदत्त नगरपालिका वडा नम्बर ११ मा तेस्रो संस्करणको मेयर कप डे-नाइट टी-१० क्रिकेट प्रतियोगिता सोमबारदेखि सुरु हुने भएको छ। भीमदत्त नगरपालिका वडा नम्बर ११ को आयोजनामा हुने यो प्रतियोगिताको उद्घाटन समारोहमा सुदूरपश्चिमका चर्चित गायक चक्र बमको विशेष प्रस्तुति रहने आयोजकले जनाएको छ।
प्रतियोगिताले स्थानीय खेलाडी र क्रिकेट प्रेमीहरूमा ठुलो उत्साह सिर्जना गरेको छ। २४ टिमको सहभागिता रहने यो प्रतियोगिताले कञ्चनपुरको खेल क्षेत्रमा नयाँ रौनक थप्ने अपेक्षा गरिएको छ। प्रतियोगिताको पुरस्कार राशि पनि आकर्षक राखिएको छ। प्रथम हुने टिमले ३ लाख रुपैयाँसहित ट्रफी र प्रमाणपत्र प्राप्त गर्नेछ भने दोस्रो हुने टिमले १ लाख ५० हजार रुपैयाँ पाउनेछ। सेमिफाइनलमा पुग्ने दुवै टिमलाई प्रोत्साहन स्वरूप ७ हजार रुपैयाँ र उत्कृष्ट प्रदर्शन गर्ने खेलाडीलाई विभिन्न पुरस्कार प्रदान गरिनेछ।
वडाध्यक्ष प्रकाश थापाले प्रतियोगिताको उद्देश्यबारे भने, “यो प्रतियोगिता क्रिकेटको विकास, नयाँ खेलाडी उत्पादन, गड्डाचौकी क्षेत्रको पर्यटन प्रवर्द्धन र कञ्चनपुरको खेल क्षेत्रको समृद्धिका लागि आयोजना गरिएको हो।” उनले थपे, “मैले चुनाव जितेदेखि हरेक वर्ष यो प्रतियोगिता गर्दै आएको छु र यो तेस्रो संस्करणले अझै धेरैको मन जित्नेछ भन्ने विश्वास छ।”
यो प्रतियोगिताको विशेषता डे-नाइट दुवै समयमा खेल सञ्चालन हुनु हो। आधुनिक लाइटको व्यवस्थासहित रातको समयमा पनि खेल हुने भएकाले दर्शक र खेलाडीका लागि नौलो अनुभव बन्ने अपेक्षा छ। “खेलाडीहरू उत्साहित छन् र स्थानीय समुदायको साथ पनि छ,” थापाले भने, “यो प्रतियोगिताले हाम्रो क्षेत्रको पहिचान बढाउनेछ।”
प्रतियोगिताको प्रत्यक्ष प्रसारणको व्यवस्था गरिएको छ, जसले कञ्चनपुरबाहिरका दर्शकलाई पनि खेल हेर्ने अवसर दिनेछ। आधुनिक सुविधासहितको मैदान र रातको लाइट व्यवस्थाले खेलाडीलाई उत्कृष्ट प्रदर्शन गर्न प्रेरित गर्ने अपेक्षा छ। उद्घाटन समारोह भीमदत्त नगरपालिकाका नगर प्रमुख पदम बोगटीले गर्नेछन् भने स्थानीय खेल प्रेमी, खेलाडी र विभिन्न व्यक्तित्वहरूको उपस्थिति रहनेछ।
आयोजकका अनुसार यो प्रतियोगिताले खेल क्षेत्रसँगै पर्यटन र सामाजिक एकताको विकासमा योगदान पुर्याउनेछ। वडाध्यक्ष थापाले आगामी वर्षहरूमा प्रतियोगितालाई अझ ठुलो स्तरमा आयोजना गर्ने योजना रहेको बताए। “हाम्रो लक्ष्य कञ्चनपुरलाई क्रिकेटको हब बनाउनु हो,” उनले भने। स्थानीय सरकार, खेलाडी र समुदायको संयुक्त प्रयासले यो प्रतियोगिता सफल हुने विश्वास व्यक्त गरिएको छ।
