कञ्चनपुर । कञ्चनपुरको महेन्द्रनगरस्थित सब्जी मण्डीमा बिक्री हुने तरकारीहरूको विषादी परिक्षण गरिएको छ। विषादी अवशेष द्रुत विश्लेषण प्रयोगशाला अत्तरियाले महेन्द्रनगर स्थित सब्जी मण्डीमा बिक्री हुने तरकारीहरूको विषादी परिक्षण गरेको हो।
आइतबार विषादी अवशेष द्रुत विश्लेषण प्रयोगशाला अत्तरियाका नायब प्राविधिक सहायक राजेन्द्र प्रसाद भट्टले सब्जी मण्डीमा बिक्री हुने तरकारीहरूको नमुना सङ्कलन गरेर छड्के जाँच गरिएको बताउनुभएको छ। साथै उहाँले विषादी अवशेष द्रुत विश्लेषण प्रयोगशालाले अत्तरियामा नियमित विषादी परिक्षण गर्ने गरेको भए पनि अन्य स्थानहरूमा समेत विषादी अवशेष द्रुत विश्लेषण प्रयोगशाला अत्तरियाले नियमित छड्के चेकजाँच गर्दै आएको बताउनुभयो।
त्यसैगरी मण्डी व्यवसायी सङ्घ कञ्चनपुरका अध्यक्ष विशाल सोनारले विगत देखि नै उपभोक्ताहरूको स्वास्थ्यलाई मध्यनजर गर्दै स्वदेश तथा विदेशबाट आयात हुने तरकारीहरूको समय समयमा विषादी परिक्षण गरिँदै आएको बताउनुभयो। साथै उहाँले हाल परीक्षणका क्रममा नमुना सङ्कलन गरिएका तरकारीहरूको अत्तरियास्थित विषादी अवशेष द्रुत विश्लेषण प्रयोगशालामा परिक्षण गर्दा उपभोग गर्न योग्य रहेको बताउँदै आगामी दिनहरूमा पनि समय समयमा यस्ता चेकजाँच निरन्तर गरिने बताउनुभयो।
महेन्द्रनगरस्थित सब्जी मण्डी बाट ४ वटा स्थानीय र ६ वटा भारत तथा पहाडी जिल्ला बाट आयात गरिएका तरकारीहरूको नमुना सङ्कलन गरि परिक्षण गरिएको थियो। परिक्षण गरिएका १० वटै तरकारी उपभोग योग्य पाइएको विषादी अवशेष द्रुत विश्लेषण प्रयोगशाला अत्तरियाले जनाएको छ।
