राखेका छन् सम्हालेर अक्सर ती यादहरू।
आउछन् भनेर हिउँद पछि सधैं बर्षादहरू।
खुँम्चिदै गएका सिद्धान्तले समेट्न सकेनन्,
के काम लागे र हाम्रा निम्ति तिम्रा वादहरू।
फुलेका चेतनाभित्र अँटाउन सक्दैनन् ती,
जो गर्न जान्दैनन् लफडाहरू फसादहरू।
विधिले नै विधि नचिन्ने अनौठा थिती छन्
विधिहरूले नै जन्माएको छ जल्लादहरू।
न्यायको के आशा मलाई यो अदालतबाट
जहाँ प्रायः दर्ता नै हुँदैनन् मेरा फिरादहरू।