दुनियाँभरी महामारी, कोरोनाको कहर छ
अनौठो यो भाइरस, ज्यानैमार्ने जहर छ
घरभित्रै थुनिदियो, मै हुँ भन्ने शासकलाइ नि
लाखौँ जीवन चुँडिलग्यो, अझै वैरी नजर छ
सुनसान छ वनपाखा, सन्नाटा छ गाउँभरी
कस्तो डर पलाएको, मृत शान्त शहर छ
छैन भन्छन उपचार, विज्ञान पनि फेल भयो
सबैतिर लकडाउन भो, कस्तो वैरी निडर छ
उत्पत्तिको सुइको मात्रै, पाउनु पर्छ दुष्ट वैरी
च्याप्प समाइ कोरोनाको, घाँटी थिच्ने रहर छ
रमेश पन्त “मीतबन्धु” को झुल्के घाम गजल सङ्ग्रह बाट