कवितामा गजलको कस कतै पाइन्छ र ?
गजल कोरी कविताको जस कतै पाइन्छ र ?
जीवनका पलहरु निरस त्यसै बितेपछि
अधुरो यो जीवनमा रस कतै पाइन्छ र ?
भन्छन् मान्छे सन्तोष नै सुखको चरम विन्दु
क्षणिक सुखले जिन्दगीको यश कतै पाइन्छ र ?
भावनाको संसारमा यात्रा गर्ने मनै थियो
भारी मन बोकी हिड्ने ‘बस’ कतै पाइन्छ र ?
पाँच पहिले, ऐले सात, सययओटा हुन्छन् कैले
खोजिरा’छु ताकी देऊ दस कतै पाइन्छ र ?
(रमेश पन्त “मीतबन्धु” को झुल्के घाम सङ्ग्रह बाट )