कसरी देखाउनु मेरो मन कति पोल्छ पोल्न देउ।
यो छातीको देब्रे-पट्टी भतभती पोल्छ पोल्न देउ।
आगो पोल्छ गुनासो छैन मायाले त पोल्न हुदैन,
मायाले नै पोलेर मार्यो अति पोल्छ पोल्न देउ।
जल्नुको कति मजा हुन्छ बत्तीलाई सोधी हेर्नुस्,
आफू जली खुसी बाड्छु जति पोल्छ पोल्न देउ।
हुँदा हुँदा यतिसम्म शुष्क भएछ दिल आजकल,
ओरालो लागेको मित्रको गति पोल्छ पोल्न देउ।
सम्पत्तिकै लागि यसरी नाङ्गिन तयार भयो हेर,
उसले बुझेन एकदिन सम्पत्ति पोल्छ पोल्न देउ।
२०७७/१२/२३ महेन्द्रनगर