बैतडी- बैतडीमा यो बर्ष खडेरीका कारण किसानहरुले भोकमरी हुने चिन्ता गर्न थालेका छन् । हिउँदे बर्षा समेत नहुँदा जिल्लाका अधिकांश ठाउँमा जमीन बाँझो रहेको छ भने गहुँ छरेका ठाउँको गहुँ पनि सुक्न थालेका छन् । लामो समयको खडेरीले सिंचाई नभएका ठाउँमा खेत बाँझै रहेका दशरथचन्द नगरपालिका १ का अम्बादत्त बडुले बताउनुभयो ।
सिंचाइको अभाव र आकाशे पानी नपर्दा खेतमा लगाएको बालीनाली सुकेको उहाँले बताउनुभयो । बैतडीका अधिकांश ठाउँमा सिंचाईको अभाव रहेको छ । सिंचाईको अभाव रहेका ठाउँका नागरिक यो बर्ष भोकमरी हुने भन्दै चिन्तित समेत बनेका छन् । गएको मंसिरदेखि पानी परेको छैन् । आकाशे पानीको भरमा खेती गर्ने ठाउँका नागरिकलाई समस्या भएको सुर्नया ४ का रामबहादुर महराले जानकारी दिनुभयो ।
बैतडीमा १७ हजार ५ सय हेक्टर जमीनमा गहुँ खेती हुँदै आएको छ । ८ हजार हेक्टर जमीनमा मात्रै सिंचाईको सुविधा रहेको कृषि ज्ञान केन्द्र बैतडीका प्रमुख दिलबहादुर सिंहले जानकारी दिनुभयो । खडेरीका कारण यो बर्ष गहुँबालीको उत्पादनमा २५ देखि ३० प्रतिशत सम्म कमी आउने अनुमान गरिएको छ । रोगसंगै भोकको महामारी हुने भन्दै किसानहरु चिन्तित भएका हुन् ।
खेतमा लगाएको बाली सबै सुकेर खेत बाँझै रहेको स्थानीयहरुले बताएका छन् । खडेरीका कारण किसानहरुलाई नराम्ररी प्रभावित गरेको भएपनि स्थानीय सरकारहरुले केही पनि कार्यक्रम ल्याउन सकेका छैनन् ।
(भगीरथ अवस्थीले निङ्गलाशैनी मा लेखेका छन्।)
