बैतडी- बैतडीको सिगासमा फलाम खानी भेटिएको छ । सिगास गाउँपालिका १ को जुकेपानीमा फलाम खानी भेटिएको हो । वडाको दाब तथा ढणारीगाड, उत्तरमा जयपृथ्वी राजमार्ग बृन्दावनबाट करिब ३ किलोमीटरभित्र र दक्षिणमा खरक्यौडा भन्ने स्थानको बिचमा फलाम खानी भेटिएको सिगास गाउँपालिका वडा नं १ का वडा अध्यक्ष गगनसिंह धामीले जानकारी दिनुभयो ।
सो फलाम खानीमा सुभम मिनिरल्स प्राइभेट कम्पनी तथा चिनको संयुक्त साझेदारीमा फलाम उत्खननको काम भईरहेको उहाँले बताउनुभयो । फलाम उत्खननका लागि वडा र गाउँपालिकाबाट सिफारिश दिएर काम समेत शुरु भईसकेको वडा अध्यक्ष धामीले जानकारी दिनुभयो ।
यही चैत्र ८ गतेबाट फलाम खानीमा उत्खननको काम भईरहेको बताइएको छ । सुभम मिनिरल्सले परीक्षणकालमा मात्रै करिब ८० प्रतिशत ढुङ्गामा फलाम भेटिएको बताएको छ ।
फलाम खानीमा फलाम भेटिएको खबर आएको र केहीदिनभित्र विद्युत विस्तारको तयारी समेत भईरहेको वडा अध्यक्ष धामीले जानकारी दिनुभयो । फलाम खानी भेटिएसंगै सो ठाउँमा स्थानीयहरुले रोजगारी समेत पाउने अपेक्षा गरिएको छ ।
(रेडियो निङ्गलाशैनी बाट साभार)
