भेट्छौ अनि छुट्टिन्छौ कुरा खास गर्दैनौ।
मैले भनेको पनि तिमीले विश्वास गर्दैनौ।
आशा पलाउने गरि कुरा कहिले गर्दैनौ,
र भन्छौ निरास भयौ किन आस गर्दैनौ?
जहिले खाली स्वार्थका कुरा गर्छौ मित्र,
कसरी बुझ्नु मैले तिमी बकबास गर्दैनौ।
भट्टिमा बसेर इतिहासको समिक्षा गर्छौ
कसरी भन्नू इतिहासको उपहास गर्दैनौ।
यस्तै गरिरहे कसले पत्याउँछ तिमीलाई,
कसले भन्छ र देशको सत्यानास गर्दैनौ?
तिमी हिडेको बाटो हेर्दा म भन्न सक्दिन,
आफ्नै कर्तुतको आफै पर्दाफास गर्दैनौ।
२०७७/११/१५ महेन्द्रनगर