नेपाल धितोपत्र बोर्डको सूचीकृत कम्पनीहरुलाई दियो ११ बुँदे निर्देशन , पालना नभए कडा कारबाही !
काठमाण्डौ । नेपाल धितोपत्र बोर्डले सबै सूचीकृत संगठित संस्थाहरुलाई समयमै सञ्चालन तथा वित्तीय विवरणहरु सार्वजनिक गर्ने व्यवस्था मिलाउन निर्देशन दिएको छ।
बोर्डले धितोपत्रमा लगानी गर्ने लगानीकर्ताहरुलाई संगठित संस्थाको सञ्चालन तथा वित्तीय अवस्थाका बारेमा सुसूचित गराउन, अध्ययन अनुसन्धानमा सहजता ल्याउन, सुसूचित भई लगानी गर्न र पुँजीबजारलाई स्वच्छ र प्रभावकारी बनाई लगानीकर्ताको हित संरक्षण गर्ने कार्यलाई व्यवस्थित गर्न संगठित संस्थालाई आज बुधबार ११ बुँदे निर्देशन दिएको हो।
संगठित संस्थाहरुले आफ्नो वेबसाइट तयार गरी संस्थाको लेटर प्याडमा पनि उक्त वेबसाइटको नाम उल्लेख गर्न बोर्डले निर्देशन दिएको छ। त्यस्तै संगठित संस्थाहरुले आफ्नो वेबसाइटमा संस्थाको परिचय, सञ्चालक समिति, व्यवस्थापन समिति, गुनासो सुन्ने अधिकारी, अनुपालना अधिकारी र कम्पनी सचिवलगायतको विवरण (नाम र फोन नम्बर) तुरुन्त राख्न निर्देशन दिइएको छ।
कम्पनीहरुले प्रत्येक तीन महिनाको वित्तीय विवरणहरु उक्त त्रैमासिक अवधि समाप्त भएको ३० दिनभित्र बोर्डसमक्ष पेस गर्ने र त्यस्ता प्रतिवेदन राष्ट्रियस्तरको दैनिक पत्रिकामा प्रकाशन गरी आफ्नो वेबसाइटमा कम्तीमा ५ वर्षसम्मका वित्तीय प्रतिवेदनहरु राख्न पनि बोर्डले निर्देशन दिएको छ।
बोर्डले प्रत्येक आर्थिक वर्ष समाप्त भएको ५ महिनाभित्र वार्षिक प्रतिवेदन बोर्ड र धितोपत्र बजारसमक्ष पेस गर्नुपर्ने र उक्त विवरण आफ्नो वेबसाइटमा पनि कम्तीमा ५ वर्षसम्म राख्ने व्यवस्थान गर्न पनि कम्पनीहरुलाई निर्देशन दिएको छ।
त्यस्तै धितोपत्रको बजार मूल्यमा असर पार्न सक्ने सूचना कुनै घटना वा कारोबार भएमा त्यस्ता विषयको सूचना तत्काल धितोपत्र बजारमा दिई आफ्नो वेबसाइटमा राखी बोर्डमा समेत यथाशीघ्र विद्युतीय माध्यमबाट सूचना पठाउन बोर्डले निर्देशन दिएको छ। त्यस्ता सूचना तथा घटना बोर्डले विकास गरी लागू गरेको विद्युतीय विवरण प्रवाह प्रणाली वा इमेलमार्फत जानकारी गराउन सकिनेछ।
यसैगरी संगठित संस्थाहरुले साधारणसभाको सूचना र सभामा छलफल हुने विषय साधारणसभा हुनुपूर्व र साधारणसभा सम्पन्न भएको ३० दिनभित्र साधारणसभामा पेस भएका प्रस्ताव, छलफल भएका विषय र निर्णयसम्बन्धी विवरण बोर्डमा अनिवार्य रुपमा पेस गर्नुपर्ने र आफ्नो वेबसाइटमा पनि राख्नुपर्नेछ।
कम्पनीहरुले वार्षिक प्रतिवेदनका साथ बोर्डमा तोकिएको ढाँचामा संस्थागत सुशासनसम्बन्धी प्रतिवेदन समेत आफ्नो वेबसाइटमा राख्ने व्यवस्था मिलाउन बोर्डले निर्देशन दिएको छ। कम्पनीहरुले आफ्नो वेबसाइटमा संस्थाको कम्तीमा ५ वर्षको प्रमुख वित्तीय परिसूचकहरु जस्तै– संस्थाको पुँजी, वार्षिक आम्दानी, खर्च, जगेडा कोष, प्रतिसेयर आम्दानी, मूल्य आम्दानी अनुपात, प्रतिसेयर नेटवर्थ, लाभांशलगायतका विवरणको चार्टसहितको प्रोफाइल बनाई राख्न निर्देशन दिइएको छ।
निर्देशनमा यी कामकारबाही समयमै भए नभएको यकिन त्रैमासिक रुपमा सम्बन्धित संगठित संस्थाका प्रमुख कार्यकारी अधिकृत, कम्पनी सचिव वा अनुपालन अधिकृतले गर्नुपर्ने भनिएको छ।
यो निर्देशनका पालना भए नभएको विषयमा बोर्डले फागुन मसान्तबाट अनुगमन गर्ने भएको छ। यदि निर्देशन पालना नभएको पाइएमा धितोपत्रसम्बन्धी ऐनबमोजिम कारबाही दण्ड जरिवाना हुने बोर्डले चेतावनी दिएको छ।
(bizshala.com बाट साभार)
