बैतडी– बैतडीका बिभिन्न स्थानिय तहहरुमा रहेका स्वयम सेवक शिक्षकहरुले न्युन पारिश्रमिकमा काम गरिरहेका छन । दश वटा स्थानिय तह रहेको बैतडीमा दोगडाकेदार गाउँपालिका बाहेक अन्य सबै स्थानिय तहहरुले स्वयम सेवक शिक्षकहरु राखेका छन । नेपाल सरकारले पारिश्रमिकका लागी न्युनतम मापदण्ड लागु गरेको भए पनि बैतडीका स्थानिय तहहरुले आफु अनुकुल शिक्षकहरुको पारिश्रमिक दिदै आईरहेका छन । बिभिन्न स्थानिय तहमा कार्यरत स्वयम सेवक शिक्षकहरुको पारिश्रमिममा एकरुपता नहुनु र उचित पारिश्रमिकको ब्यबस्थापन नगरिदा शिक्षा क्षेत्रको शैक्षिक गुणस्तरमा प्रभाब परेको छ ।
श्रम ऐन २०७४ को दफा १०६ र १०७ अनुसार श्रम, रोजगार तथा सामाजिक सुरक्षा मन्त्रालयले हरेक क्षेत्रमा काम गर्ने श्रमिकको न्युनतम पारिश्रमिक मासिक १३ हजार ४ सय ५० निर्धारण गरेको भए पनि यहाँका स्थानिय तहहरुले यसको पुर्ण कार्यान्वय नगरेको पाईएको छ । एउटै तहमा अध्यापन गराउने शिक्षकहरुले पनी पालिकै पिच्छे फरक फरक र न्युन पारिश्रमिकमा काम गरिरहेका छन । पाटन नगरपालिकाले सबै स्थानिय तहहरुको भन्दा कम पारिश्रमिकमा स्वयम सेवक शिक्षक राखेको देखिएको छ ।
पाटन नगरपालिका भित्र आधारभुत तह १ कक्षा देखि ८ सम्म अध्यापन गराउने शिक्षकहरुलाई मासिक ७ हजार ५ सय र माबि तहमा १० कक्षासम्म अध्यापन गराउने शिक्षकहरुलाई ९ हजार ५ सय पारिश्रमिक दिदै आएको छ । सिगास गाउँपालिकाले आधारभुत तह १ कक्षा देखि ५ कक्षासम्म अध्यापन गराउने शिक्षकलाई मासिक ८ हजार , ८ कक्षासम्म अध्यापन गराउने शिक्षकलाई १२ हजार र माबि तह १० कक्षासम्म अध्यापन गराउने शिक्षकलाई १६ हजार दिदै आएको छ । जिल्लाको डिलाशैनी गाउँपालिकाले आधारभुत तह कक्षा १ देखि ५ सम्म अध्यापन गराउने शिक्षकलाई मासिक १० हजार, ८ कक्षासम्म अध्यापन गराउने शिक्षकलाई १२ हजार , माबि तह १० कक्षासम्म अध्यापन गराउने शिक्षकलाई १५ हजार र १२ कक्षासम्म अध्यापन गराउने शिक्षकलाई १८ हजार तलब दिदै आएको छ ।
सुर्नया गाउँपालिकाले आधारभुत तह कक्षा १ देखि ५ सम्म मासिक १० हजार , ८ सम्म १५ हजार र माबि तह कक्षा १० सम्म अध्यापन गराउने शिक्षकलाई २० हजार दिदै आएको छ । पञ्चेश्वर गाउँपालिकाले आधारभुत तहमा कक्षा १ देखि ५ सम्म अध्यापन गराउने शिक्षकलाई मासिक १० हजार, ८ कक्षा सम्म १२ हजार र माबि तह १० कक्षासम्म अध्यापन गराउने शिक्षकलाई २० हजार दिदै आएको छ । यस्तै मेलौली नगरपालिकाले आधारभुत तह कक्षा १ देखि ५ सम्म अध्यापन गराउने शिक्षकलाई १० हजार, ८ कक्षासम्म ११ हजार, माबि तह १० कक्षासम्म १४ हजार र कक्षा १२ सम्म अध्यापन गराउने शिक्षकलाई १५ हजार दिदै आएको छ ।
दशरथचन्द नगरपालिकाले आधारभुत तह कक्षा १ देखि ५ सम्म मासिक १३ हजार, कक्षा ८ सम्म १३ हजार ५ सय र माबि तह कक्षा १० सम्म अध्यापन गराउने शिक्षकलाई १८ हजार तलब दिदै आएको छ । पुर्चौडी नगरपालिकाले आधारभुत तह कक्षा १ देखि ५ सम्म मासिक १३ हजार, कक्षा ८ सम्म १४ हजार र माबि तह कक्षा १० सम्म २० हजार ५ सय दिदै आएको पाईएको छ । यस्तै जिल्लाको शिबनाथ गाउँपासिलकाले भने प्राथमितक तह, निमाबि तह र माबि तहमा नेपाल सरकारले तोकेको सम्बन्धित तहको पारिश्रमिक स्केलको ५०÷५० प्रतिशतका दरले पारिश्रमिक दिदै आएको छ । यता शिक्षक बिकास तथा समन्वय ईकाई बैतडीले भने स्थानिय तहहरुले आ–आफ्नै तरिकाले कार्यबिधिहरु बनाएकोले स्वयम सेवक शिक्षकहरुको सेवा सुबिधामा एक रुपता नभएको जनाएको छ ।
(रेडियो बैतडी बाट साभार)
