बैतडी- माघ २३ बैतडीको नेपाल भारत सीमानाका झुलाघाट नाका खुल्ने भएको छ ।
भोली शनिबारदेखि नियमति रुपमा नाका खुल्ने भएको हो ।
नेपाल सरकार मन्त्रिपरिषदको भारतसगं सीमा जोडिएका बिभिन्न नाकाहरु खुला गर्ने निर्णय बमोजिम झुलाघाट नाका पनी खुला गर्न लागिएको बैतडीका सहायक प्रमुख जिल्ला अधिकारी शिबराज जोशीले जानकारी दिनुभएको छ ।
“हामीले नियमित रुपमै नाका खुला गर्न आग्रह गरेका थियौ । अब सुचना जारी गरेको छ । नियमित रुपमै खुला हुन्छ होला ”उहाँले भन्नुभयो ।
यस अघि माघ १६ गतेदेखि नै नाका खुला गर्ने भनिए पनि भारतिय पक्षले नमान्दा ढिलाई भएको हो ।
अहिले भारतिय पक्षले समेत नाका खुलाउनका लागी सुचना जारी गरेको जिल्ला प्रशासन कार्यालय बैतडीले जनाएको छ ।
जिल्ला प्रशासन कार्यालय बैतडीले एक सुचना जारी गर्दै आबश्यक काम भएका, अलपत्र परेका नेपाली र भारतीय नागरिकहरुलाई तोकिएको स्वास्थ्य तथा सुरक्षाको पुर्ण मापदण्ड पालना गरी आवात जावत गर्न सकिने जनाएको छ ।
सरकारले कोरोना भाइरसको जोखिम रोकथाम तथा नियन्त्रणका लागि भन्दै गत चैत १० गतेदेखि नेपाल–भारत सीमा नाका बन्द गरेको थियो।
( रेडियो बैतडी बाट साभार)