बैतडी– माघ २१, बैतडीमा नागरिकता बनाउनेको संख्या बढेको छ । नागरिकता बनाउनका लागी जिल्ला प्रशासन कार्यालयमा अहिले दैनिक ५० देखि सय जनासम्म सेवाग्राहीहरु आउने गरेका छन । तुलनात्मक रुपमा बैतडीमा नागरिकता बनाउनेको संख्या बढेको हो । जिल्ला प्रशासन कार्यालय बैतडीबाट चालु आर्थिक बर्षको अहिलेसम्म ३५ सय बढीले नागरिकता लिएका छन ।
चालु आर्थिक बर्षको श्रावन देखि अहिलेसम्म ३ हजार ७ सय ६५ जनाले नयाँ नागरिकता लिएका छन । श्रावनमा ४ सय ५१ जना , भदौमा ७८ जना, असोजमा ४ सय ३३ जना र कार्तिकमा ८ सय ७८ जनाले नागरिकता लिएको सहायक प्रमुख जिल्ला अधिकारी शिब राज जोशीले जानकारी दिनुभएको छ । यस्तै मंसिरमा ५ सय ६९ जना, पुसमा ६ सय ८८ जना र माघ महिनाको २० गतेसम्म ५ सय ६८ जनाले नागरिकता लिएको उहाँको भनाई छ ।
लामो समयसम्म कोरोना महामारीका कारण गरिएको लकडाउनमा जिल्ला प्रशासन कार्यालय बन्द रहेकोले अहिले नागरिकता लिनेको संख्या उल्लेख्य रुपमा बढेको प्रमुख जिल्ला अधिकारी मोहन राज जोशीले बताउनुभयो । कोरोनाका कारण जिल्ला बाहिर रहेकाहरु पनी यो अबधिमा जिल्ला फर्किएकोले नागरिकता बनाउनेको संख्या बढेको उनको भनाई छ ।
नागरिकता नबनाई सानैमा भारत गएका युवाहरुले पनी अहिले नागरिकता बनाएका छन । सुरक्षा निकाय लगायत बिभिन्न सरकारी सेवामा प्रबेश गर्नको लागी पनी नागरिकता अनिबार्य भएकोले नागरिकता लिनेको संख्यामा बृद्धि भएको जिल्ला प्रशासन कार्यालय बैतडीले जनाएको छ ।
(रेडियो बैतडीबाट साभार)
