बैतडी- माघ १९,संसद विघटनको विरोधमा नेपाली कांग्रेसका भातृसंस्थाहरुले बैतडीमा पनि विरोध प्रदर्शन गरेका छन् ।
नेपाली कांग्रेसको केन्द्रिय निर्णय अनुसार जिल्ला तहमा पनि संसद विघटनको विरोधमा प्रदर्शन गरिएको तरुण दल बैतडीका उपाध्यक्ष महेश भट्टले जानकारी दिनुभयो ।
नेपाल विद्यार्थी संघ, तरुण दल, नेपाल महिला संघ, नेपाल दलित संघ लगायतका कांग्रेसका भातृसंस्थाहरुले संसद विघटनको विरुद्धमा प्रदर्शन गरेका उहाँले बताउनुभयो ।
असंवैधानिक तरीकाले संसद विघटन गरिएकाले आफुहरु सडकमा उत्रिएका प्रदर्शनारिहरुको भनाई छ ।
लोकतान्त्रिक चोक शाहीलेकबाट शुरु भएको विरोध र्याली गढी हुँदै गोठलापानीमा विरोधासभामा परिणत भएको थियो ।
कपील केसीको नेतृत्वमा नेविसंघ, घनश्याम भट्टको नेतृत्व तरुण दल, देवु ठगुन्नाको नेतृत्वमा महिला संघ र रमेश कोलीको नेतृत्वमा दलित संघ प्रदर्शनमा उत्रेका थिए ।
प्रदर्शनमा जिल्लाका १० ओटै स्थानीय तहबाट नेपाली कांग्रेस र भातृसंस्थाका नेता तथा कार्यकर्ताहरुको सहभागिता रहेको भट्टले जानकारी दिनुभयो ।
गोठलापानीमा आयोजित विरोधसभामा बोल्दै नेताहरुले संसद विघटन असंवैधानिक कदम भएको दोहर्याएका छन् । प्रधानमन्त्री ओलीले गरेको संसद विघटनका विरुद्ध नेपाली कांग्रेस र भातृसंस्थाहरु आन्दोलनमा उत्रेका हुन ।
( रेडियो बैतडीबाट साभार)
