बैतडी- शहीद दशरथचन्दको जन्मघरलाई पाहुना घर बनाउने काम भईरहेको छ । दशरथचन्द नगरपालिका ५ बस्कोट स्थित शहीद चन्दको जन्मघरलाई पाहुना घर बनाउने काम भईरहेको शहीद दशरथचन्द स्मृति प्रतिष्ठानका अध्यक्ष विनोदबहादुर चन्दले जानकारी दिनुभयो । प्रतिष्ठनको अगुवाईमा शहीद चन्दको जन्मघरलाई पाहुना घर बनाउन लागिएको उहाँले बताउनुभयो ।
चन्दको जन्मघरलाई जिर्णोद्वार गरी पाहुनाघर निर्माणको काम भईरहेको अध्यक्ष चन्दले बताउनुभयो । ४ कोठे घरलाई मर्मत गरिसकिएको छ भने शौचालय निर्माणको काम भईरहेको अध्यक्ष चन्दले बताउनुभयो । उहाँले भन्नुभयो ‘शहीद दशरथचन्दको जिवनीका बारेमा जानकारी लिन चाहनेहरुका लागि त्यतै बसोबासको व्यवस्था गर्दैछौं । यसले शहीदको जिवनीका बारेमा सबैलाई ज्ञान दिन सजिलो हुने हाम्रो विश्वास छ ।’
शहीद दशरथचन्दको जन्मघरलाई उहाँको जीवनको श्रोतको रुपमा विकसित गर्ने उद्देश्य रहेको स्मृति प्रतिष्ठानले जनाएको छ । शहीद चन्दको नाममा खोलिएको प्रतिष्ठानले विभिन्न सामाजिक कार्य पनि गर्दै आएको छ ।
दशरथ चन्दको जन्म वि. सं. १९६० असारमा बैतडी जिल्लाको बस्कोटमा पिता शेरबहादुर चन्द र आमा ओजकुमारी चन्दको कोखमा माहिला छोराका रूपमा भएको थियो । राणाशासनका विरोधीहरूमा सबैभन्दा सशक्त व्यक्तित्व शहीद चन्दले मानविकी तथा समाजशास्त्र विषयमा वनारसबाट प्रमाणपत्र तह उत्तीर्ण गर्नुभएको थियो ।
त्यसअघि उहाँले नेपालगंज, भारतको अल्मोडा, कुमाउँ, नैनीताल जस्ता ठाउँमा शिक्षा ग्रहण गर्नुभएको थियो । तत्कालीन राणा सरकारले वि. सं. १९९७ माघ १५ गते दशरथ चन्दलाई शोभाभगवतीमा गोली हानी मृत्युदण्ड दिइएको थियो ।
शहीद दशरथचन्दका बारेमा जानकारी गराउन प्रतिष्ठानले काम गरिरहेको भएपनि सरकारी स्तरबाट खासै सहयोग हुन नसकेको प्रतिष्ठानका अध्यक्ष चन्दले बताउनुभयो ।
(ninglashainionline.com बाट साभार)
