बैतडीमा शहीद दशरथ चन्दको जन्मघरमा मनाइयो शहीद दिवस !

बैतडी- शहीद दशरथचन्दको जन्मभूमी बैतडीमा पनि विभिन्न कार्यक्रमको आयोजना गरी शहीद दिवस मनाइएको छ । शहीद दशरथचन्द स्मृति प्रष्ठिानको आयोजनामा र्यालीपछि श्रद्धाञ्जली सभाको आयोजना गरी दिवस मनाइएको शहीद दशरथचन्द स्मृति प्रतिष्ठानका अध्यक्ष विनोदबहादुर चन्दले जानकारी दिनुभयो ।

शहीद दशरथचन्द स्मृति प्रतिष्ठान भवन सुन्दरखालीबाट र्यालीको आयोजना गरेर शहीद दशरथचन्दको जन्मघर बस्कोटमा श्रद्धाञ्जली सभाको आयोजना गरिएको अध्यक्ष चन्दले जानकारी दिनुभयो ।

श्रद्धाञ्जली सभामा सहभागीहरुले शहीद दशरथचन्दको शालीकमा माल्यार्पण गरेका थिए । यस्तै नेपाल प्रहरीको एक टोलीले शहीदप्रति सलामी अर्पण गरेको थियो सो सभामा बोल्ने अधिकांश वक्ताहरुले शहीद दशरथचन्द प्रति राज्यले ध्यान नदिएको गुनासो गरेका छन् । शहीद दशरथचन्द स्मृति प्रतिष्ठानलाई सरकारी प्रतिष्ठानको रुपमा अघि बढाउनुपर्ने उनीहरुले माग गरेका छन् ।

अहिले पनि शहीदका सपना साकार नभएकाले सरकारले त्यो दिशामा अघि बढ्नुपर्ने वक्ताहरुले बताएका छन् । शहीदले परिकल्पना गरेको लोकतन्त्र अझै स्थापित हुन नसकेको उनीहरुको भनाई छ । शहीद दशरथचन्द स्मृति प्रतिष्ठानका अध्यक्ष विनोदबहादुर चन्दको अध्यक्षतामा भएको सभामा जिल्ला समन्वय समितिका प्रमुख सिद्धराज भट्ट प्रमुख अतिथी रहनुभएको थियो ।

सो सभामा दशरथचन्द नगरपालिकाका प्रमुख नरेन्द्रसिंह थापा,उपप्रमुख मीना चन्द, पाटन नगरपालिकाका प्रमुख केशवबहादुर चन्द,प्रमुख जिल्ला अधिकारी मोहनराज जोशी, प्रहरी नायव उपरीक्षक नारायणप्रसाद अधिकारी, विभिन्न राजनीतिक दलका पदाधिकारीहरुको समेत सहभागिता रहेको थियो । शहीद दशरथचन्दको जन्मघर बस्कोटमा अहिले पाहुनाहरुलाई बसोबासको समेत व्यवस्था गरिएको थियो ।