सुदूरपश्चिम खबर
sudurpashimkhabar.com

४ बर्षमा २ किलोमिटर सडक पनि नबनाउने ठेकेदारलाई सडक डिभिजन कार्यालयले जरिवाना तिराउने !

चितवन । दुई किलोमिटर सडक विस्तारको काम चार बर्षमा पनि नसक्ने ठेकेदारलाई सडक डिभिजन कार्यालय भरतपुरले जरिवाना तिराउने भएको छ ।

भरतपुरको वाइपास सडक विस्तारको जिम्मा लिएको गौरी पार्वती निर्माण सेवालाई पेनाल्टी (जरिवाना) हुने भएको हो । पटकपटक थपिएको म्याद पुस मसान्तभित्र सकिएपछि कार्यालयले सो कम्पनीलाई जरिवाना तिराउन लागेको हो ।

डिभिजन सडक कार्यालय भरतपुरका प्रमुख कृष्णराज अधिकारीका अनुसार ठेक्का सम्झौताको ०.०५ प्रतिशतदेखि १० प्रतिशतसम्म जरिवाना गराउने कानुनी व्यवस्था छ ।

World Link Ads
Mahakali Polytechnic

सम्झौता र थपिएको म्याद सकिए पनि कामको जिम्मा सोही कम्पनीलाई हुने तर जरिवाना तिरेर मात्रै काम गर्नुपर्ने डिभिजन प्रमुख अधिकारीले बताए । अधिकारीका अनुसार उसलाई अब काम गर्ने समयका आधारमा जरिवाना निर्धारण गरिने छ ।

कोरोना भाइरस र लकडाउनका कारण काम प्रभावित भएको भन्दै पछिल्लो पटक पुस मसान्तसम्म म्याद थप गरिएको थियो । तर उक्त कम्पनीले अहिलेसम्म ८० प्रतिशत मात्र काम सम्पन्न गरेको छ । कार्यालय प्रमुख अधिकारीले अब मिति थप नहुने जानकारी दिए ।

निर्माण कम्पनीले मिति सकिए पनि जरिवाना तिरेर अधिकतम २ सय दिनसम्म काम गर्न पाउँछ । सो अवधिमा पनि काम सम्पन्न नभए ठेक्का सम्झौता रद्ध हुने कानुनी व्यवस्था छ । २०७३ चैत ९ गतेदेखि शुरु भएको सडक विस्तारको काम २०७४ चैत १८ गतेसम्म सम्पन्न भइसक्नुपर्ने थियो । १५ महिनामा सक्नुपर्ने काम ४ वर्ष पुगिसक्दा पनि अझै पूरा हुन सकेको छैन । यस अवधिमा पाँच पटकसम्म म्याद थप भइसकेको कार्यालयले जनाएको छ ।

Sana Kishan

१२ करोड ८१ लाख ८२ हजार रुपैयाँमा ठेक्का पाएको सो कम्पनीले सडक विस्तारको काम पेटी ठेकेदारलाई दिएको छ । अलि अलि काम गरे जस्तो देखाउने, भुक्तानी लिने र महिनौंसम्म ठेकेदार हराउने सो क्षेत्रका स्थानीय बताउँछन् ।

ठेकेदारले केही ठाउँ कालोपत्रे गरे पनि गुणस्तर राम्रो छैन । सुरुमा वसपार्कदेखि आँपटारीसम्म ४.४ किलोमिटर डेडिकेटेड डबल लेन बनाउने भनिएको थियो । पछि चार लेनको बनाउने भनियो । ठेक्काको जिम्मा लिएको गौरी पार्वती निर्माण सेवाले वसपार्कदेखि विशालचोकसम्म २.४ किलोमिटर मात्रै सडक विस्तार गर्ने गरी ठेक्का पुनरावलोकन भयो ।

घटेको दूरीको सडक पनि विस्तार नगरेर ठेकेदारले हैरान पारेको इन्जिनियरहरु बताउँछन् । सडकको दुबैतर्फ नाली अनिवार्य भने पनि सबै ठाउँमा नाली बनाएको छैन ।

बाँकी खण्ड विशालचोकदेखि आँपटारीसम्म भागलाई दोस्रो प्याकेज बनाएर रायमाझी पशुपति जेभी कम्पनीलाई ठेक्का दिइएको छ । केही समयअघि मात्रै ठेक्का सम्झौता भएको दोस्रो प्याकेजको काम अघि बढेको कार्यालयका सूचना अधिकारी इन्जिनियर शिव खनालले जानकारी दिए ।

दुई बर्षभित्र चार लेन बनाउने सडक २६ करोडमा ठेक्का सम्झौता भएको हो । सडकको चौडाइ भाग दुईतर्फी नालीसहित २४ मिटर र पिच १४ मिटर हुनेछ । पहिलो प्याकेज ठेक्काको सर्भिस लेन भने डिभिजन कार्यालयले अलग्गै बनाउने छ ।

 

(अनलाइनखबर बाट साभार)

Purnagiri Ads
Indreni
सम्वन्धित समाचार
New digital House
जवाफ छाड्नुस्

Your email address will not be published.