काठमाडौँ। दक्षिण एसियाली खेलकुद (साग) को १३ औँ संस्करणमा ऐतिहासिक चार स्वर्ण पदक जित्न सफल पौडीकी गौरिका सिंह वर्षको उत्कृष्ट महिला खेलाडी बनेकी छिन्। गौरिकाले आजएनएसजेएफ पल्सर स्पोर्ट्स अवार्ड २०७६ मा उत्कृष्ट महिला विधाको अवार्ड जितेकी हुन्।
एकै संस्करणमा चार स्वर्ण पदक जित्ने कीर्तिमान बनाएकी गौरिकाले एथलेटिक्सकी सन्तोषी श्रेष्ठ, तेक्वान्दोकी आयषा शाक्य, ट्रायथलनकी सोनी गुरुङ र करातेकी अनु अधिकारीलाई पछि पार्दै नेपाल खेलकुदको सबभन्दा प्रतिष्ठित अवार्ड जित्न सफल भएकी हुन्।
गौरिकाले गत वर्ष नेपालमै सम्पन्न १३ औँ सागमा चार स्वर्णसहित दुई रजत र तीन कांश्य पदक जितेकी थिइन्। उनले सागमा सर्वाधिक स्वर्ण जित्ने दीपक विष्टको कीर्तिमान पनि बराबरी गरेकी थिइन्। गौरिकाले गत वर्ष नेपालगञ्जमा सम्पन्न आठौं राष्ट्रिय खेलकुद प्रतियोगितामा पनि सहभागी भएको सबै स्पर्धामा स्वर्ण पदक जित्न सफल भएकी थिइन्। गौरिकाले आठौंमा १२ स्वर्ण पदक जितेकी थिइन्।
२०७६ लाई स्वर्णमय बनाएकी गौरिका वर्षभर नेपाली खेलकुदमा चर्चामा रहिन्। जसका कारण उनी पिपल्स च्वाइस विधाको मनोनयनमा पनि पर्न सफल भएकी थिइन्। तथापि उनले उक्त विधाको अवार्ड भने जित्न सकिनन्। पिपल्स च्वाइस विधामा नेपाली राष्ट्रिय भलिबल टीमकी कप्तान अरुणा शाहीले बाजी मारिन्।
सातदोबाटोस्थित अन्तर्राष्ट्रिय खेलकुद परिसरको तेक्वान्दो हलमा भएको अवार्ड कार्यक्रममा यसअघि उत्कृष्ट युवामा गल्फका सुवास तामाङ, महिला राष्ट्रिय भलिबल टीमले उत्कृष्ट वर्ष टीमको अवार्ड जित्न सफल भयो। त्यस्तै उत्कृष्ट प्रशिक्षकको अवार्ड तेक्वान्दोका नविन श्रेष्ठले जिते। दीगमसिंह चेमजोङ पारा एथलिट अवार्डबाट सम्मानित भए, त्यस्तै स्पेसल अवार्डबाट एथलेटिक्सकी सन्तोषी श्रेष्ठ र तेक्वान्दोकी आयषा शाक्यले जितिन्।
