डोल्पा : कोरोना संक्रमितलाई थप उपचारका लागि सिम्रिक हेलिकोप्टरबाट काठमाडौं लगिएको छ। संक्रमणपछि आइसोलेसनमा बसेका दुई जनाको स्वास्थ्य अवस्था गम्भीर बनेपछि जिल्लामा उपचार सम्भव नहुँदा थप उपचारका लागि शुक्रबार उक्त हेलिकप्टरबाट संक्रमितलाई काठमाडौं लगिएको हो।
स्थानीय सरस्वती माविमा पढाउने शिक्षक र ठूलीभेरी नगरपालिका–२ का वडाध्यक्षको स्वास्थ्य जटिल भएपछि आफन्तले हेलिकोप्टरबाट काठमाडांै लगेको जिल्ला प्रशासन कार्यालय डोल्पाले जानकारी दिएको छ। शिक्षक दम, प्रेसर र सुगरका बिरामी हुन्। त्यस्तै, वडाध्यक्षलाई पनि दमको समस्या छ। दुवै जना दीर्घरोगी भएको र चिसो बढेपछि थप समस्या भएको डाक्टरहरूको भनाइ छ।
पुस महिनामा दुई चरणमा कोरोना परीक्षण गर्दा जिल्लामा ९ जना संक्रमित भेटिएका थिए। हाल अन्य ७ जना निको भएर घर फर्किए पनि २ जनाको अवस्था गम्भीर भएपछि जिल्लामा उपचार हुन नसकेको हो।
प्रमुख जिल्ला अधिकारी माधवप्रसाद ढकालले जिल्लामा उपचार हुन नसकेपछि काठमाडौं पठाइएको बताए। शिक्षकमा कोरोना देखिएपछि प्रजिअ ढकालकाअनुसार एक साताका लागि विद्यालय बन्द गरिएको छ।
(annapurnapost.com बाट साभार)
