कञ्चनपुर, १५ पुस । कञ्चनपुरको बेलौरीमा युवा तथा कृषकहरुका लागि तीन महिने पोल्ट्री फार्म वर्कर तालिम सञ्चालन गरिएको छ । युरोपियन युनियनको आर्थिक सहयोग, ब्रिटिस काउन्सिलको व्यवस्थापन र दक्षता परियोजनाको सहयोगमा निड्स नेपालले उक्त तालिम सञ्चालन गरेको हो । उक्त तालिममा बेलौरी र बेलडाँडीका २० जना युवा तथा कृषक प्रशिक्षार्थीहरु रहेका छन् । बुधबार एक औपचारिक कार्यक्रमका बीच तालिमको उद्घाटन गरिएको छ ।
बजारमा आधारित प्राविधिक तथा व्यावसायिक सीप प्रवद्र्धन परियोजना अन्तर्गक कञ्चनपुरको बेलौरी र बेलडाँडीका युवा तथा कृषकहरुलाई लक्षित गरी तीन महिने पोल्ट्री फार्म वर्कर तालिम सञ्चालन गरिएको दक्षता परियोजनाका संयोजक विनोद कडाराले जानकारी दिनुभएको छ । उहाँका अनुसार, अहिले कञ्चनपुर, कैलाली र बझाङ जिल्ला गरी सुदूरपश्चिम प्रदेशका तीन जिल्लामा दक्षता परियोजनामार्फत विभिन्न कार्यक्रम सञ्चालन भइरहेका छन् ।
अहिले कोभिड १९ को महामारीका कारण अधिकांश युवाहरुले रोजगारी गुमाउनु परेको परिस्थितिलाई मध्यनजर गर्दै स्वरोजगार तर्फ युवाहरुलाई प्रेरित गर्ने र आत्मनिर्भर बनाउने उद्देश्यले यस्ता कार्यक्रमलाई प्राथमिकता दिइएको निड्स नेपालका कार्यकारी निर्देशक भवराज रेग्मीले बताउनु भयो । तीन महिने तालिमबाट सिकेका विषयवस्तुहरुलाई दैनिक जीवनमा प्रयोग गर्न सके जीविकोपार्जनमा सहज हुने उहाँले विश्वास व्यक्त गर्नुभयो ।
बुधबार एक औपचारिक कार्यक्रमका बीच गरिएको तालिमको उद्घाटन समारोहको सहजीकरण मनराज उपाध्यायले गर्नुभएको थियो । पछिल्लो समयमा सरकारी तथा गैरसरकारी संघसंस्थाहरुले विभिन्न किसिमका सीपमूलक तालिमहरु सञ्चालन गर्दै आएका छन् । ती तालिममा सहभागी भएका व्यक्तिहरुले प्राप्त गरेको सीपको सदुपयोग गरेमा मात्रै पनि केही हदसम्म बेरोजगारी समस्या कम हुने देखिन्छ ।
