चितवन, पुष ७ – संसद विघटनको विरोधमा प्राज्ञिक विद्यार्थी परिषद्, नेपालले प्रदर्शन गरेको ।
परिषद्को भरतपुर महानगरपालिका इकाई कमिटी चितवनले विरेन्द्र क्याम्पस चोकमा मंगलबार साँझ विरोध प्रदर्शन गरेको हो ।
महानगर कमिटीका अध्यक्ष शरदचन्द्र काफ्लेको नेतृत्वमा भएको प्रदर्शनमा सहभागीहरुले संसद विघटनको निर्णय खारेज गर्न माग गरेका थिए ।
प्रदर्शनकारीहरुले संसद विघटन जनतामाथिको धोका हो, संसद पुनःस्थापन गर, अधिनायकवाद र निरंकुशताको अन्त्य गर, एक व्यक्ति संस्था र दललाई होइन लोकतन्त्रलाई बलियो बनाऔं, देशको संसद, देशको शान र लोकतन्त्रको एक पहिचानलगायतका नाराहरु लेखिएका प्लेकार्ड बोकेको थिए ।
विरोध कार्यक्रममा बोल्दै अध्यक्ष काफ्लले संसद विघटन असंवैधानिक भएको भन्दै यसलाई खारेज गरिनु पर्ने बताए । प्राज्ञिक विद्यार्थी परिषद्, नेपालले देशभर विभिन्न कार्यक्रम गरेर संसद विघटनको विरुद्धमा प्रदर्शन गरिरहेको बताउँदै उनले यसलाई अझै शसक्त पारिने बताए ।
महानगर इकाइ कमिटीका सचिव आदर्शन सापकोटाले आफूहरुले सरकारको विरोध नगरेको बताउँदै उसले लिएको असंवैधानिक कदमलाई खारेज गर्न माग गरेको बताए । जनताले पाँच वर्षसम्मका लागि भनेर जनप्रतिनिधि चयन गरेर पठाएकाले पाँच वर्षपछिमात्र चुनाव हुनुपर्ने आफूहरुको अडान रहेको उनले बताए ।
सत्तारुढ दल नेपाल कम्युनिष्ट पार्टी (नेकपा)मा विवाद चुलिँदै गएपछि नेकपा अध्यक्ष एवं प्रधानमन्त्री केपी शर्मा ओलीले मन्त्रिपरिषद्बाट संसद विघटनको निर्णय गराएर आइतबार राष्ट्रपति समक्ष सिफारिस गरेका थिए । राष्ट्रपतिले प्रधानमन्त्रीको सिफारिसलाई स्वीकृत गरेपछि संसद विघटन भएको छ । तर संसद विघटन संविधान विपरित भएको भन्दै नेकपाभित्र र बाहिर विरोध भइरहेको छ । यतिबेला देशभर संसद विघटनको पक्ष र विपक्षमा प्रदर्शन भइरहेका छन् । सर्वोच्च अदालतमा संसद विघटनको निर्णय खारेजीको माग गर्दे रिट पनि परेको छ । अदालतको फैसला आउन बाँकी छ ।naryanionline बाट सभार
