काठमाडौं । प्रधानमन्त्री तथा नेकपा अध्यक्ष केपी शर्मा ओली अर्का अध्यक्ष प्रचण्डलाई भेटन खुमलटार जाँदैछन् ।
प्रचण्ड सचिवालयले दिएको जानकारी अनुसार, अध्यक्ष ओली अहिले बिहान खुमलटार जान लागेका हुन ।
पार्टीभित्र दुईलाइन संघर्ष चर्किएको बेला ओलीको खुमलटार भ्रमण निकै अर्थपूर्ण देखिन्छ ।
प्रधानमन्त्री भएपछि ओली खुमलटार गएको यो पहिलोपटक हो ।
शुक्रबारका दिन प्रचण्ड–नेपालले कार्यकर्तासँग छलफल गरेपछि ओली थप दबाबमा परेका थिए । शुक्रबार नै ओली र प्रचण्डबीच बालुवाटारमा समेत भेट भएको थियो । अध्यादेश फिर्ता नगरे थप कदम थाल्ने निर्णयमा पुगेका प्रचण्डसँग ओलीको आजको भेटमा अरु को को नेता सहभागी हुने कुरा अहिले खुलेको छैन ।
ओलीले खुमलटार आउन लागेको कुरा आजै बिहान जानकारी गराएको सचिवालयले जनाएको छ ।
ओली निकट नेता सुवास नेम्वाङले ओली खुमलटार आउन लागेको जानकारी गराएका थिए ।
भदौ २६ को सहमतिविपरित ओलीले एकलौटीरुपमा निर्णय गरेपछि पार्टीभित्र संकट गहिरिएको थियो । त्यसपछि सचिवालयका ५ जना सदस्यले तत्काल पार्टी बैठक राख्न माग राखेपनि ओलीले नमानेपछि लिखित निवेदन दिएका थिए । तर ओलीले बैठक राख्नुको साटो पत्रमार्फत लिखित निवेदनको जवाफ दिएपछि प्रचण्डले पार्टी र सरकारको समिक्षासहित राजनीतिक प्रस्ताव बैठकमा पेश गरेका थिए । प्रचण्डको प्रस्ताव फिर्ता लिनुपर्ने माग राख्दै ओलीले समेत अर्को प्रस्ताव पेश गरेपछि नेकपाको विवाद उत्कर्षमा पुगेको थियो ।
गत २८ गते बसेको बैठकमा अध्यादेश फिर्ता लिने निर्णय भएपनि ओलीले फिर्ता नलिएपछि हिजो प्रचण्ड र माधव नेपाल लगायतका नेताहरुले कार्यकर्ताहरुसँग भेटघाट गरी पछिल्लो राजनीतिक परिस्थितिका बारेमा चर्चा गरेका थिए
