शुक्लाफाँटा नगरपालिकाले कोरोना संक्रमण र जोखिम बढेपछि पुनः सामुदायिक र संस्थागत विद्यालयमा सञ्चालन
भइरहेको शिक्षण सिकाई क्रियाकलाप बन्द गर्ने निर्णय गरेको छ । कोभिड–१९ को बढ्दो संक्रमणका कारण आजदेखि पौष ५ गतेसम्मका लागि सबै सामुदायिक तथा संस्थागत विद्यालय बन्द गर्ने निर्णय गरेको हो । लामो लकडाउनपछि सञ्चालनमा आएका विद्यालयहरु पुनः बन्द भएका छन् ।
कोरोना संक्रमणको जोखिम कम भएको भन्दै खुलेका अधिकांश विद्यालय फेरि बन्द गरिएको हो । नगरपालिकाले सञ्चालन भइरहेका विद्यालय पौष ५ गतेसम्म बन्द गर्न निर्देशन दिएको छ । नगरपालिकाको निर्णयलाई बेवास्ता गरी प्रत्यक्ष विधिबाट कक्षा सञ्चालन गरे त्यसबाट हुने जोखिमको सम्पूर्ण जिम्मेवारी प्रधानाध्यापक र विद्यालय व्यवस्थापन समितिको हुने नगर शिक्षा शाखा प्रमुख टिकेन्द्र प्रसाद भट्टले बताए ।
सामुदायिक र संस्थागत विद्यालयका प्रधानाध्यापक सहित नगर प्रमुख दिल बहादुर ऐरको अध्यक्षतामा बसेको वैठकले मंसिर २४ गतेदेखि पौष ५ गतेसम्म विद्यालय बन्द गर्ने निर्णय गरेको छ । लामो समयदेखि अवरुद्ध पठनपाठन पुनः सुचारु गर्नाका लागि मंसिर २१ गतेदेखि सामुदायिक तथा संस्थागत विद्यालय सञ्चालन गर्न नगर कार्यपालिकाले निर्णय गरेको थियो । विद्यार्थी संख्या, भौतिक पूर्वाधार र कोभिडको प्रभावलाई ध्यानमा राखी सुरक्षा मापदण्ड पूरा गरेर विद्यालय सञ्चालन भएका थिए ।
शिक्षा, विज्ञान तथा प्रविधि मन्त्रालयबाट यसअघि जारी आजवाट गरिएको विद्यार्थी सिकाइ सहजीकरण निर्देशिका २०७७ को व्यवस्था बमोजिम नगरपालिकाले स्वास्थ्य सुरक्षा मापदण्ड पूरा गरेर विद्यालय सञ्चालन गरेको थियो । शुक्लाफाँटामा हालसम्म १ सय २४ जनामा कोरोना संक्रमण देखिएको छ । संक्रमितमध्ये नौजना मात्रै सक्रिय संक्रमित रहेका शुक्लाफाँटा नगरपालिकाका स्वास्थ्य शाखा प्रमुख परमानन्द भट्टले जानकारी दिए । संक्रमितमध्ये २ जनाको कोरोनाका कारण मृत्यु भइसकेको छ ।
