कञ्चनपुर, २६ असोज । नेपाल विद्युत् प्राधिकरणले कञ्चनपुरको लालपुर सवस्टेशनमा रहेको ट्रान्सफर्मरलाई बदली गरी दोब्बर क्षमताको नयाँ ट्रान्सफर्मर जडान गर्ने भएको छ । नेपाल विद्युत प्राधिकरणको लालपुर १३२ केभी सवस्टेशनमा रहेको १५ एमभिएको पावर ट्रान्सफर्मरलाई बदली गरी ३० एमभिए क्षमताको नयाँ ट्रान्सफर्मर जडान गर्न लागिएको नेपाल विद्युत प्राधिकरण अत्तरिया ग्रिड शाखाले जनाएको छ ।
प्राधिकरणको अत्तरिया ग्रिड शाखाले एक सूचना जारी गर्दै नयाँ ट्रान्सफर्मर जडान गर्नुपर्ने भएकोले कञ्चनपुरको कृष्णपुर बाहेक अन्य आठ वटै स्थानीय तहमा यही असोज २७ गते मंगलबारदेखि कार्तिक १ गते शनिबारसम्म विद्युत सेवा अवरुद्ध हुने जनाएको छ । ती स्थानहरुमा ११ केभी फिडरबाट आलोपालो गरेर उक्त अवधि भरी विद्युत आपुर्ति गरिने जनाइएको छ । प्राधिकरणले यसबाट ग्राहकवर्गमा पर्न जाने असुविधाको लागि क्षमा याचना समेत गरेको छ ।
