कञ्चनपुर । लामो समयदेखि बन्द रहेको कञ्चनपुरको मझगाउँ विमानस्थल सञ्चालन गर्न फागुनदेखि निर्माणकार्य अगाडि बढाइने भएको छ । आइतबार कञ्चनपुर आएको नेपाल नागरिक उड्डययन प्राधिकरणको प्राविधिक टोलीले बन्द रहेको विमानस्थलको स्थलगत निरीक्षण गरिसकेपछि फागुनदेखि विमानस्थलको निर्माणकार्य अघि बढाउने सम्भावना रहेको जनाएको हो ।
नेपाल नागरिक उड्डययन प्राधिकरण प्राविधिक टोलीका इन्जिनियर रत्नबहादुर श्रेष्ठले जग्गाको समस्या भए पनि पहिलो फेजको निर्माणकार्य गर्न आयोजनाको स्टिमेट भैइरहेको बताए । उनले भने( ‘स्टिमेट भएपछि आयोजनाको चेकजाँचको क्रममा निरीक्षण गर्नुपर्ने हुन्छ सोही अनुरुप निरीक्षण गर्न टोली महेन्द्रनगर आएको हो ।’
धावनमार्गका लागि लम्बाइ चौडाइको अवस्था राम्रो छ ।चौडाइ ठीक भए पनि लम्बाइका लागि भने केही जग्गा लिजमा लिनुपर्ने सम्भावना रहेको उनले बताए । गत वर्ष घेरबार गरिएको विमानस्थलको लम्बाइ र चौडाइ प्राविधिक टोलीले नापजाँच समेत गरेको छ ।नागरिक उड्डययन प्राधिकरणको प्राविधिक टोलीले जग्गा अधिग्रहण तथा विमानस्थलको क्षेत्रफलको बारेमा स्थानीय जनप्रतिनिधि तथा सरोकारवालसँग छलफलसमेत गरेका थिए ।
यस्तै स्टिमेटअनुसार काम अगाडि बढे फागुनदेखि निर्माणकार्य सुरु हुने सम्भावना रहेको प्राविधिक टोलीको भनाइ छ । सुदूर आवाजमा विकास सिंह महताले यो खबर लेखेका छन ।
