धनगढी, ५ भदौ । गत मंगलबार राति करीब १२ बजे अछामको कैलाश खोलामा आएको बाढीका कारण बगेर बेपत्ता भएका १७ जना मध्ये ११ जना अझै फेला परेका छैनन ।
बाढीपीडित बारे जानकारी लिन सरकारका गृहमन्त्री रामबहादुर थापा बादल ले आज पीडित परिवारहरु संग भेटघाट गरेका छन । काठमाडौबाट सुर्खेत पुगेका गृहमन्त्री थापा त्यहाबाट नेपाली सेनाको हेलिकप्टर मार्फत अछाम पुगेको सुदुरपश्चिम प्रदेश प्रहरी कार्यालय दीपायलका निमित्त प्रहरी प्रमुख एसएसपी मुकेस कुमार सिंहले बताए ।
नेपाल सरकारका गृहमन्त्री रामबहादुर थापा, उद्योग वाणिज्य तथा आपूर्ति मन्त्री लेखराज भट्ट, प्रदेशका आर्थिक मामिला तथा योजना मन्त्री झपट बहादुर बोहरा सहितको टोली घटना स्थल पुगेको हो ।
पीडित परिवारलाई भेटि सरकारको तर्फबाट उचित राहत तथा हराइरहेकाहरुको खोजि कार्यमा कुनै कमि हुन नदिने बताउदै सुर्खेत फर्केका गृहमन्त्री थापा मौसममा आएका खराबीका कारण अछामकै साफेमा रहेका छन ।
बाढीमा हराइरहेका मध्ये फेला परेका थप तिनजनाको समेत सनाखत भएको छ । सनाखत हुनेमा रामारोश गाउपालिका ५ कै बबिता बुढा साउद, अमर साउद र ननसरा शाह रहेको एसएसपी सिंहले बताए ।
यसअघि फेला परेका रामारोशन गाउँपालिका–५ सैनीबजारका नबिन साउद, चन्द्र साउद र गौरी शाहको रहेका थिए ।
हराइरहेकाहरुको उद्दार तथा खोजका लागि नेपाली सेना, नेपाल प्रहरी र शसस्त्र प्रहरी तथा स्थानीयहरु खोजिकार्यमा लागि रहेका छन ।
