मुम्बई । कोरोना संक्रमणका कारण दुई साता अस्पताल बसेर घर फर्किएका बलिउड अभिनेता अमिताभ बच्चन सामान्य जीवनमा फर्किएका छन् ।
आफू अब पूर्ण रूपमा स्वास्थ्य भएकाले सामान्य जीवनमा फर्किएको उनले बताएका छन् ।
तीन साताअघि अभिनेता अमिताभ बच्चन, अभिषेक बच्चन, अभिनेत्री ऐश्वर्या राय बच्चन, ऐश्वर्याकी छोरी आरध्या बच्चन कोरोना संक्रमित भएका थिए । यी चारै जनाले कोरोना जितिसकेका छन् ।
अमिताभ बच्चनले सामाजिक सञ्जालमा तस्बिर सार्वजनिक गर्दै आफू कोरोनालाई तिजेर दैनिक जीवनमा फर्किएको बताएका छन् ।
आफ्नो बुबाको एउटा कवितासहित आफूले एउटा रूख रोपिरहेको तस्बिर उनले सार्वजनिक गरेका छन् । सबैका निरन्तर मायाले आफूहरूले कोरोना जितेको र पूर्ण सावधानी अपनाएर दैनिक काममा पनि क्रियाशील हुन थालेको अमिताभको भनाइ छ ।
कोरोनालाई जितेर दैनिक जीवनमा फर्कन सकिन्छ भन्ने सन्देश अमिताभले यतिबेला दिएका छन् । उनीसँगै अभिषेकले पनि कार्यालयको काम सुरु गरेका छन् । अमिताभ अब केही दिनमै फिल्मको सुटिङमा जोडिने भएका छन् ।
