काठमाडौं । त्रिभुवन विश्वविद्यालय अन्तर्गतका सबै क्याम्पसहरु आजदेखि खुल्ने भएका छन् । आजैदेखि सरकारले औपचारिक रुपमा लकडाउन समाप्त गरेपछि त्रिविले सुरक्षा मापदण्ड कार्यान्वयन गर्दै सबै क्याम्पसहरु सञ्चालनमा ल्याउने निर्णय गरेको हो ।
लकडाउन खुलासँगै विश्वविद्यालयले आफ्नो नियमित कार्यक्रम सुचारु गर्ने निर्णय गरेको त्रिविले जनाएको छ । नेपालमा कोरोना भाइरसको सन्त्रास बढेपछि गत चैत्र ११ गतेदेखि त्रिविका सबै कार्यक्रमहरु बन्द भएका थिए । विश्वविद्यालय पूरै सञ्चालन गर्ने निर्णयसँगै त्रिविले विदामा बसेका सबै अध्यापकहरुलाई बोलाउने निर्णय गरेको छ ।
सबै अध्यापकहरु अब विश्वविद्यालय मातहतका सबै क्याम्पसमा हाजिर हुनेछन् । त्यसलगत्तै नियमित पठनपाठन बाहेकका अन्य शैक्षिक गतिविधिको काम अघि बढाउने योजना त्रिविको रहेको छ ।
परीक्षा भदौ ७ बाट
सरकारले भदौ १ गतेबाट विद्यार्थी भर्ना अभियान सुरु गर्दै रोकिएका सबै परीक्षा समेत सुचारु गर्ने निर्णय गरे लगत्तै त्रिविले पनि परीक्षा लिने योजना बनाएको छ ।
यसअघि स्थगित भएका सबै परीक्षा भदौ ७ गतेबाट लिने गरी तयारी भएको त्रिविका रजिष्ट्रार प्रा. पेशल दाहालले जानकारी दिए । ‘पहिले रोकिएका परीक्षा दशैं अगावै सकिनेछन् । नियमित हुनुपर्ने परीक्षा दशैं सकिएपछि लिने तयारी छ’, रजिष्ट्रार दाहालले भने ।
कोरोना भाइरसको सन्त्रासका कारण परीक्षा दिन नपाएर घरमै बसेका त्रिविका हजारौं विद्यार्थीलाई अब राहत हुनेभएको छ । खबर कुरा डटकम बाट सभार
