महेन्द्रनगर २५ चैत । कञ्चनपुरको वेदकोट नगरपालिकाले लकडाउनका कारण समस्यामा परेका नगरवासिलाई खाद्यान्न वितरण सुरु गरेको छ ।
नगरपालिकाले नगरका ज्याला मजदुरी गर्ने, बिपन्न ,अशक्त, असाहय परिवारलाई खाद्यान्न वितरण गर्न सुरु गरेको हो ।
नगर प्रमुख अशोक कुमार चन्दले राहत स्वरुप नगरवासिलाई खाद्यान्न वितरण सुरु गरिएको बताए ।
उनका अनुसार नगरपालिकाको वैठकले ज्याला मजदुरी गर्ने, विपन्न ,अशक्त, असाहय परिवारलाई परिवारको पहिचान गरि तत्कालका लागि खाद्यान्न सहयोग गर्ने निर्णय गरेको थियो । सोही निर्णय अनुसार मंगलवारदेखि खाद्यान्न वितरण सुरु भएको उनको भनाई छ ।
खाद्यान्न वितरणका लागि कार्यविधी तयार गरिएको छ । आज पहिलो दिन बेदकोट नगरपालिका–१, २, ३, ४, ८, ९ र १० मा सुरु भएको छ ।
छनोटमा परेका परिवारलाई प्रतिपरिवार २५ किलो चामल, २ किलो दाल, १ लिटर तेल, नुन २ किलो,साबुन र मास्क वितरण गरिनेछ ।
