सुदूरपश्चिम भ्रमणमा रहनु भएका राष्ट्रपति विद्यादेवी भण्डारी यही फागुन १६ गते शुक्रबार कञ्चनपुर पुग्नुहुने कार्यक्रम रहेको छ । कञ्चनपुरको भीमदत्त नगरपालिकाले पर्यटकीय क्षेत्रको प्रर्वद्धनका लागि आयोजना गरेको तेस्रो शुक्लाफाँटा पर्यटन महोत्सवलाई राष्ट्रपति भण्डारीले विशेष सम्बोधन गर्नुहुने कार्यक्रम तय भएको भीमदत्त नगरपालिकाका नगर प्रमुख सुरेन्द्र बिष्टले जानकारी दिनुभयो । भीमदत्त नगरपालिका भित्रका पर्यटकीय क्षेत्रहरुको प्रचारप्रचार गरी पर्यटन प्रर्वद्धन गर्न यही फागुन ०९ गते देखि १९ गतेसम्मका लागि तेस्रो शुक्लाफाँटा पर्यटन महोत्सव २०७६ आयोजना गरिएको हो ।
राष्ट्रपति आउनु हुने भएपछि उहाँको स्वागताका लागि कञ्चनपुरको महेन्द्रनगरमा भव्य तयारी भइरहेको छ । राष्ट्रपति विद्यादेवी भण्डारीले शुक्रबार दिउँसो १ बजे भीमदत्त नगरपालिका वडा नम्बर १६ मा रहेको मझगाउँमा आयोजना गरिने उक्त कार्यक्रममा सम्बोधन गर्नुहुने कञ्चनपुरका प्रमुख जिल्ला अधिकारी नूरहरि खतिवडाले जानकारी दिनुभयो । उहाँका अनुसार कञ्चनपुरमा राष्ट्रपतिको सुरक्षार्थ तयारी थालिएको छ । सुरक्षा निकायका सबै युनिटलाई परिचालन गरिने प्रमुख जिल्ला अधिकारी खतिवडाको भनाइ छ ।
