फागुन १०, वाशिङटन डीसी (अमेरिका) । अमेरिकी विमान निर्माता कम्पनी बोइङले ७३७ म्याक्स विमानको निरीक्षण बढाउने भएको छ ।
विमानको इन्धन ट्यांकीमा फोहोरको टुक्रा पाइएपछि कम्पनीले विमानको आन्तरिक निरीक्षण विस्तार गर्न लागेको यस मामिलाबारे जानकार स्रोतले बताएको भन्दै सञ्चार माध्यमहरुले समाचार छापेका छन् ।
कम्पनीले स्वयम् निरीक्षण गरेको मध्ये करीब दुई तिहाइ ७३७ म्याक्स विमानको इन्धन ट्यांकीमा फोहोरको टुक्रा पाइएको थियो । ७३७ म्याक्सको समस्या समाधान गर्न कम्पनीलाई सकस भइरहेको छ ।
यस्तोमा नयाँ समस्या देखिएको छ । गत वर्ष ३४६ जनाको ज्यान जाने गरी दुई ओटा विमान दुर्घटना भएपछि मार्चदेखि विश्वभर यो विमान ग्राउन्डेड छ । कम्पनीले डेलिभरी दिइ नसकेको नयाँ ७३७ म्याक्स विमानको प्रारम्भिक निरीक्षण गर्दा यीमध्ये ४०० थानभन्दा धेरैको ट्यांकीमा फोहोर पाइएको थियो ।
यो समस्या अस्वीकार्य भएको र हरेक विमानबाट यो समस्या निर्मूल पार्न उपयुक्त कदम चालिने बताइएको छ । यो हप्ताको शुरुमा बोइङले धातु खुर्किन (मेटल शेभिङ) ७३७ म्याक्सको इन्धन ट्यांकीको निरीक्षण शुरु गरेको थियो ।
विमान निर्माणको क्रममा आइपर्ने यो सामान्य समस्या हो । तर यस्ता समस्या कम गर्न कम्पनीलाई निकै गाह्रो हुने गरेको छ । कम्पनीको पछिल्लो निर्णयले ७३७ विमान यस वर्षको मध्यमा पुन : सेवामा फर्काउने योजना भने परिवर्तन नहुनेमा बोइङले जोड दिएको छ ।
