नेपाल सरकारका सञ्चार तथा सूचना प्रविधि मन्त्री एवं सहरी विकास मन्त्री गोकुल प्रसाद बाँस्कोटाले वर्तमान सरकार विकासको गतिमा तीब्रताका साथ दौडिरहेकोले कसैले अबरोध सृजना गर्दैमा नडगमगाउने दाबी गर्नुभएको छ ।
कञ्चनपुर उद्योग वाणिज्य संघले महेन्द्रनगरमा आयोजना गरेको तेह्रौं सुदूरपश्चिम प्रदेश स्तरीय औद्योगिक व्यापार मेलाको उद्घाटन कार्यक्रमलाई सम्बोधन गर्दै मन्त्री बाँस्कोटाले निजी क्षेत्रलाई पारदर्शी भएर कर तिर्न र लगानी बढाउन आग्रह गर्नुभयो । उहाँले सरकारी, गैरसरकारी र निजी लगानीमा स्रोतसाधनको पहिचान गरी उत्पादकत्व र रोजगारी सृजना गर्ने सरकारको दीर्घकालीन नीति रहेको उल्लेख गर्नुभयो ।
सरकारका प्रवक्ता समेत रहनु भएका मन्त्री बाँस्कोटाले एमसिसीका सन्दर्भमा व्यापक छलफल भइरहेकोले सरकारले एमसिसी सम्झौता गर्ने जिकिर गर्नुभयो । मन्त्री बाँस्कोटाले अन्य राष्ट्रसंग पनि सरकारले सम्झौता गर्ने उल्लेख गर्नुभएको छ ।
शिक्षा, भूमि लगायतका विषयमा पनि सरकारको नयाँ नीति आइरहेको उहाँले जानकारी दिनुभयो । मन्त्री बाँस्कोटाले सुदूरपश्चिम प्रदेशका पर्यटकीय तथा धार्मिक क्षेत्रको प्रचारप्रसार गरी पर्यटन प्रवर्द्धन गर्न निजी क्षेत्रले पनि सकृयता बढाउनु पर्नेमा जोड दिनुभएको छ ।