महेन्द्रनगर । नेपाल भम्रण वर्ष २०२० शुरू भएको एक महीना पूरा भएको छ । यस अवधिमा नेपालको पश्चिमी नाका गड्डाचौकीबाट भित्रिने पर्यटकको संख्या भने न्यून छ । अध्यागमन कार्यालय कञ्चनपुरका अनुसार गड्डाचौकीबाट जनवरीमा छिकेकी राष्ट्र भारतबाहेक देशका जम्मा २२४ जना पर्यटक भित्रिएका छन् ।
भ्रमण वर्षको पहिलो महीनामा नेपाल भित्रिनेमा सबैभन्दा बढी अमेरिकी र रसियन नागरिक रहेका छन् । अध्यागमनका अनुसार जनवरीमा अमेरिकन २८, रसियन २६, थाई (थाइल्यान्ड) २१, अस्ट्रेलियन १२ र इटालियन १० जना छन् । त्यस्तै नेपाल भित्रिएका विदेशीमा फ्रान्सका १४, इरानका १०, स्पेनका ८, बेलायतका ७, चीनका ४, जापान, बोलिभिया, युगान्डा र पेरूका ३÷३ छन् ।
अध्यागमन कार्यालयका शैलेन्द्र बडुले कार्यालयले भारत भएर नेपाल आउने तेस्रो मुलुकका पर्यटकको मात्रै तथ्यांक राख्ने गरेको बताए । उनका अनुसार यस नाका हुँदै भित्रिने पर्यटक शुक्लाफाँटा, राष्ट्रिय निकुञ्ज, बर्दीया राष्ट्रिय निकुञ्ज, र पोखरा घुम्न जाने गरेका छन् ।
सुदूरपश्चिमका पर्यटन व्यवसायी एवम् कञ्चनपुर होटल व्यवसायी संघका अध्यक्ष प्रमान्द भण्डारीले स्थानीय पर्यटकीय क्षेत्रको प्रचार–प्रसार हुन नसकेको बताए । ‘पर्यटकीय पूर्वाधारको अभाव तथा पर्यटकीय गन्तव्यको प्रचारप्रसार नहुँदा पश्चिमी नाकाबाट पर्यटक भित्रिन नसकेका हुन्,’ उनले भने, ‘प्रचारप्रसार नहुँदा चाँदनीदोधरा झुलुंगे पुल, रामारोसन, खप्तड, बडिमालिका लगायत क्षेत्र तेस्रो मुलुकका पर्यटकको नजरमा पर्न सकेका छैनन् ।’ नाकामा पर्यटनमैत्री वातावरण सृजना गर्न, सम्भावित पर्यटकीय स्थलको प्रचारप्रसार र पूर्वाधार निर्माण जोड दिन सके यस क्षेत्रमा पर्यटक भित्र्याउन सकिने उनको भनाइ छ ।
त्यस्तै, कञ्चनपुर उद्योग वाणिज्य संघका अध्यक्ष जंगबहादुर मल्लले निजी क्षेत्रलाई पनि भ्रमण वर्षको योजनाबारे जिम्मेवारी दिनु पर्ने बताए । पर्यटकीय क्षेत्रमा पूर्वाधार अभाव, कमजोर आन्तरिक सुरक्षा व्यवस्था र प्रचारको अभावमा पर्यटक भित्रिन नसकेको उनको भनाइ छ । स्थानीय निजी क्षेत्रका व्यवसायीको पहलमा जिल्ला ट्राफिक कार्यालयले महेन्द्रनगरले भारतीय पर्यटकको तथ्याङ्क राख्ने गरेको उनले जानकारी दिए । यस महीना मात्रै करीब ५ हजार भारतीय पर्यटक नेपाल भित्रिएको उनले बताए ।
