बैतडीका स्थानीय तहमा भवन नहुँदा सेवा प्रवाहमा समस्या

बैतडी ०२ कार्तिक ।

स्थानीय तहमा जनप्रतिनिधि आएको अढाइ वर्ष बित्दा पनि आफ्ना भवन नहुँदा सेवाप्रवाहमा समस्या भइरहेको छ। जिल्लाका १० स्थानीय तहमध्ये सात स्थानीय तहले भाडाका भवनबाट सेवा प्रदान गरिरहेका छन ।

दशरथचन्द नगरपालिका, मेलौली नगरपालिका र शिवनाथ गाउँपालिकाबाहेकका स्थानीय तहले भाडाकै भवनबाट सेवा दिइरहेका छन् ।

भाडाका भवन सोचेअनुसारका नपाइने हुनाले सेवाप्रवाहमा कुनै न कुनै रूपमा समस्या भइरहेको सुर्नया गाउँपालिकाका अध्यक्ष वीरबहादुर विष्टले जानकारी दिए। विद्यालयको भवन मर्मत गरेर कार्यालय सञ्चालनमा ल्याइएको उनले बताए । भवन अभावमा गाउँपालिकाका सबै विषयगत शाखालाई व्यवस्थित गर्न नसकिएको उनको भनाइ छ ।

यस्तै डिलाशैनी गाउँपालिकाले वडा नं ३ पङसेरामा महादेव माविको भवन मर्मत गरेर सम्पर्क कार्यालयमार्फत सेवा दिइरहेको छ। केन्द्र तोकेको ठाउँमा भवन नहुँदा सम्पर्क कार्यालयबाट सेवा दिइरहेको गाउँपालिका अध्यक्ष उकेन्द्र बोहराले जानकारी दिए ।

सिगास गाउँपालिकाको केन्द्र गर्जेमा भाडामा समेत भवन नपाउँदा गाउँपालिका आफैँले भवन निर्माण गरिरहेको गाउँपालिका उपाध्यक्ष द्रोपती चन्दले जानकारी दिए। एकतला निर्माण गरेर कार्यालय सञ्चालन गरिएको र अर्को तला निर्माणको काम जारी रहेको उनले बताए ।

यस्तै पुरचौडी नगरपालिकामा पनि भवन अभाव छ। भवन नहुँदा सेवाप्रवाहमा समस्या भइरहेको जनाइएको छ। पञ्चेश्वर गाउँपालिकामा पनि आफ्नै भवन नहुँदा समस्या रहेको गाउँपालिका अध्यक्ष गोरखबहादुर चन्दले जानकारी दिए। दोगडाकेदार गाउँपालिकाले पनि क्याम्पसको भवन मर्मत गरेर कार्यालय सञ्चालन गरिरहेको छ । नागरिक दैनिक अनलाईन

सम्वन्धित समाचार
Comments
Loading...